Рәхмәт, Укытучы!

Укытучылар көне уңаеннан оештырылган бөтенрусия акциясе Русиянең алты шә­һәрендә: Уфа, Екатеринбург, Мәскәү, Санкт-Петербург, Краснодар, Түбән Новгородта үтте. Мәгариф темасына һәм укытучы һөнәренә багышланган “Рәхмәт, Укытучы!” үзенчәлекле тематик күргәз­мәсе Уфада “Сис­тема” һәм “Мәрхәмәт” хәйрия фондлары ярдәме белән оештырылды. Күргәзмәдә илнең иң яхшы фотографларының дәүләт архивында тупланган үткәнгә багышланган эшләре урын алган. Зур осталык белән тотып алынган кадрларда — үз эшенә бирелгән, көчле рухлы, янып торган педагоглар.

“Киләчәккә лифт” ком­мерция карамагында булмаган парт­нерлыкның директоры Юлия Селюкова белдерүенчә, әлеге чара башта социаль челтәрләрдә “онлайн” режимда башланган. Акциягә 8 миллион кеше кушылган да инде. Аның максаты — укытучыларга рәх­мәт белдерү, аларны искә төшерү.

М. Акмулла исемендәге Башкортстан дәүләт педагогия университеты ректоры Раил Әсәдуллин барлык педагогларны һөнәри бәйрәм белән котлап, укытучының буыннарны бәйләүче генә түгел, рухи сыйфатларны, мәдәниятне саклаучы кеше булуын ассызыклап үтте.

— Укытучыдан башка якты киләчәк булмаячак, буыннар бәйлә­неше югалачак, ниһаять, Русиядә шуны ишетсеннәр һәм аң­ласыннар иде, — диде үз чыгышында Раил Әсәдуллин.

Укытучы һөнәренә багышланган фотокүргәзмә Уфада ике атна эшләячәк, аны теләгән һәркем карый ала.