-10 °С
Болытлы
VKOKTelegramБөек Җиңүгә - 80 ел
Барлык яңалыклар
Мәгариф
25 декабрь 2020, 11:40

Баланы кызыксындыра белергә кирәк!

Бу юнәлештә максатлы эш алып баручы авыл китапханәчесе Фиүзә Бурангулова республика күләмендә дә таныл у алды.

Бу юнәлештә максатлы эш алып баручы авыл китапханәчесе Фиүзә Бурангулова республика күләмендә дә танылу алды.

“Китап − белем чишмәсе” дигән сүзләргә бик тирән мәгънә салынган. Бөек Тукай да бит: “...Шул вакытта мин кулыма китап алам...” — дип язган. Китап хәзерге вакытта да, нинди генә булуына карамастан — электронмы, бастырылганмы – яшәргә, фикер йөртергә, аралашырга өйрәтә, кыскасы, һич саекмас рухи чишмә ул.


Балачактан укырга яратып, китап аның сердәшенә, киңәшчесенә, рухи таянычына әверелгән кешеләр була. Бүздәк авылының 2нче мәктәбе китапха­нәчесе Фиүзә Бурангулова — нәкъ шуларның берсе.
Китапханәче хезмәтен ул очраклы гына сайламаган, әлбәттә. Фиүзә Риф кызы Бүздәк районының Кыска-Елга авылында туып, Таллыкул авылында үсә. Мәктәп тәмамлагач, хисапчыга укыса да, бик күп өлкәләрдә эшләргә туры килә: колхозчы, пешекче, лаборант, сыер савучы, идән юучы, кошчылык инкубаторында оператор, сатучы, авыл клубы мөдире... Китапханәче эшен исә Шланлыкул авылында яңа социаль-мәдәни үзәк ачылгач башлый.
Матур әдәбият сөючеләр, мәктәп балалары белән аралашу көндәлек гадәтенә әйләнә яшь китапханәченең. Район гәзите белән ныклы бәйләнешкә кереп, укучы балаларның белем алуда тырышлыгы, авыл халкы турында мәкаләләр дә яза.
“Тормышта укытучым, тугры киңәшчем дә, сердәшем Асия ханым Сакаева булды, мин аңа бик рәхмәтлемен. Ягымлы тавышы белән кирәк вакытта дөрес итеп төзәтеп тә җибәрә, киңәшен дә бирә, эшеңә гадел йомгак та ясый. Авылдашлар, мәктәп балалары белән бергәләп кызыклы чаралар: юбилейлар, язучылар белән очрашулар, шигърият кичәләре, конкурслар, әдәбият атналыклары үткә­релде”, — дип сагынып искә ала Фиүзә Риф кызы.
Биш ел эшләгәннән соң, тормыш агышы аны Благовар районы үзәкләште­релгән китапханә челтәренә күчәргә мәҗбүр итә. Анда эшләгәндә иҗатчылар­ны туплап, “Каләмдәшләр” клубын оештыра, язучылар һәм җырчылар белән бергәләп “Җырлый каләм, Тыңла, галәм!” дигән нәфис сүз, җыр-моң проектына башлангыч бирүче дә ул. Әлеге иҗади табыш күпләрнең күңеленә хуш килә, аны марафон рәвешендә районнан районга тапшырырга дигән карар чыгарыла. Ә инде эшкә туган районына кайткач, шун­дый чараны Бүздәк районы үзәкләш-терелгән китапханәсендә оештырып, хезмәтенә югары бәһа ала ул. Районыбыз мәдәнияте үзәгендә 7 район (Бүздәк, Кушнаренко, Чакмагыш, Туймазы, Чишмә, Благовар, Илеш) иҗатчылары катнашлыгында зур әдәби кичә үткәрелә.
Китапханәче хезмәтенең бик кызыклы, мавыктыргыч һәм, бер үк вакытта, бик мә­шәкатьле икәнлеге күптән билгеле. Шуңа да, бу өлкәдә үз һөнәренә җаны-тәне белән бирелгән, укымышлы, яңа­лык­лардан хәбәрдар, әдәбият дөнья­сында иркен йөзүче, тирән белемле хез­мәткәрләр генә эшли ала да. Фиүзә Риф кызы безнең Бүздәкнең 2нче мәктәп ки­тап­ханәсендә әле елдан артык кына эш­ләсә дә, хезмәттәшләрен ихтирам итеп, үз эшен яратып башкара.
Сабыйларның мәш килеп китап сайлауларын күреп куана белү, күпләрнең серен йөрәгенә сыйдырып, китап сүзе белән юату кебек сыйфатлар хас безнең хезмәттәшебезгә. Укучы балалар китап­ханәгә бик теләп йөри. Күргәзмәләр, буклетлар, стендлар белән танышу, юбиляр­ларның китапларын уку, кызыклы аралашу — Фиүзә Риф кызының гадәти эше.
Әйткәндәй, китапханәбез заман таләп­ләренә туры китереп яңартылган бинада урнашкан, заманча таләпләргә ярашлы җиһазландырылган. Интернет, WI-FI һәм башка алдынгы технологияләр – бүгенге заман таләбе. Китапханәдә автоматлаштырылган китапханә-мәгълүмат системасы – “Аверс” программасы булдырыл­ган. Китап эшкәртү, электрон каталог төзү буен­ча да китапханә автомат режимда эшли башлаячак. Бу программа буенча һәр кайткан китапка штрих-код куела. Алдагы елдан китап укучыларга китап­ларның электрон билет аша бирелү, аларның исәбен алу да электрон формада башкарыла башлаячагы максат итеп куелган. Аудио һәм видеоформаттагы китаплар уку мөмкинлеге тудырыла.
Фиүзә Бурангулова агымдагы елда республика күләмендә оештырылган мәктәп китапханәләре арасындагы һөнәри бәйгедә катнашып, зур уңышка иреште. Атап әйткәндә, “Иң яхшы мәктәп китап­ханәсе” конкурсында “Хәзерге авыл мәктәбе китапханәсе — укуга җәлеп итү үзәге” номинациясендә икенче урынны яулады. Абруйлы бәйгедә җиңүчегә бүләкнең дә саллысы — принтер тапшы­рылды. Ул, әлбәттә, мәктәп китапханәсенә куелды.
— Хезмәтемә югары бәһа бирүләренә рәхмәтлемен, — ди Фиүзә Риф кызы. — Дөресен әйткәндә, бәйгедә җиңү миңа яңа хезмәт үрләренә этәргеч тә бирә. Гомумән, китапханәнең белем бирүдә роле артканнан-арта. Минемчә, балалар­да китап укуга кызыксыну уяту гаи­ләдән, балалар бакчасыннан ук башланырга тиеш. Мәктәп исә аларга китап дөньясына яңа юл ача.

Роза Таһирова,
Бүздәк 2нче мәктәбенең татар теле һәм әдәбияты укытучысы.
Бүздәк районы.
Читайте нас: