Мәктәпләр ышанычлы сак астындамы?

Безнең мәгариф объектларын квалификацияле саклау буенча югары күрсәткечләребез юк, объектларның 60 проценты гына андый сакка ия. Бу хакта республика Хөкүмәтендәге оператив киңәшмәдә мәгариф һәм фән министры Айбулат Хаҗин белдерде. Хәзерге вакытта республикада министрлык карамагында 4 050 мәгариф объекты эшли. Шулардан 1100дән артык кеше булган 51 объект — 1нче хәвеф категориясенә, 2нче категориягә – 198 объект, 3нче категориягә – 1989 объект, 4нче категориягә 1812 объект керә.

Ведомство җитәкчесе билгеләвен­чә, берен­чедән, “Росгвардия”гә вәкаләтләрне тапшырганнан соң, мәктәпләрне техник саклау хез-мәте бәясе берничә тапкыр арткан. Хәзер ул сәгатенә 9 сум 90 тиен тәшкил итә, элек сәга­тенә 3 сум 92 тиен иде.
“Мондый хезмәтнең хакы кискен күтәрелү еллык чыгымнарның артуына китерде һәм 52,5 миллион сум чамасы тәшкил итте, шулай ук Башкортстан Республикасы бюджетыннан, муниципаль район һәм шәһәр округлары бюджетларыннан ел саен өстәмә 141,6 миллион сумга якын акча бүленде”, — диде Айбулат Хаҗин.
Мәгариф объектларын квалификацияле саклауның җитәрлек дәрәҗә­дә булма­вының икенче сәбәбе — авыл җирендә шәхси сак оешмалары булмау.
12 майга мәгариф объектларын инженер-техник системалар һәм саклау чаралары белән тәэмин итүгә һәм җиһазлауга ихтыяҗ 530,3 миллион сум тәшкил итә, шуның 496,7 миллион сумы — муниципаль белем бирү оешмалары, 33,6 миллион сумы — Мәгариф һәм фән министрлыгы карамагындагы оешмалар өчен.
“Бездә мәктәпләр күп, башка төбәкләрдәге кебек түгел. Өч моментны искә алырга кирәк: мәктәпләрне техник яктан тәэмин итү, физик саклау һәм, иң мөһиме — педагог­ларның ба­лалар белән эшләве. Бүген укытучылар коллективларын балаларга игътибар күрсәтергә, үсмерләрнең үз-үзләрен тотышына игътибар итәргә өндәү мөһим. Чөнки тормыш Казандагы кебек фаҗига­ләрне еш кына булдырмый калырга мөмкин булуын күр­сәтә”, — дип билге­ләп үтте төбәк Башлыгы Радий Хәби­ров.
Киңәшмәдә муниципа­литетларның хакимият башлыкларына мәктәпләрдә хокук саклау органнары һәм сак оешмалары вәкилләре белән берлектә тиешле тема буенча укыту-тренировка чараларын оештырырга кушылды.
Шулай ук, Башкортстан Республикасы буенча Эчке эшләр министрлыгы, Русия гвар-диясенең Башкортстан буенча идарәсе белән берлек­тә, белем бирү оешмасына кораллы һөҗүм булган очрак­та, сакчылар, җитәкче, мәга­риф оешмалары хезмәт­кәр­ләренең һәм укучыларның үз-үзләрен тоту кагыйдәләренең бердәм алгоритмын булдырырга киңәш ителде.
Шушы көннәрдә Татар­стан­ның Актаныш районында Башкортстан Дәүләт җые­лышы-Корылтай һәм Татарстан Дәүләт Советының Мәга­риф, мәдәният һәм фән буенча профильле комитет­ларының уртак утырышы уз­ды. Анда күрше төбәкләрнең республика парламентлары спикерлары Константин Толкачев һәм Фәрит Мөхәммәт­шин катнашты. Утырышта күтәрелгән мөһим тема­лар­ның берсе, Казанда булган фаҗигале вакыйгаларга бәй­ле, мәктәпләрдә хәвефсез­лекне тәэмин итүгә юнәл­телде. Шунысы мөһим — ике республика депутатлары закон чыгару карарларын бер­гә­ләп эшләргә планлаштыра.
“Казандагы фаҗига барыбызга да мәктәп­ләрдә хәвеф­сезлекне тәэмин итү систе­масының ни дәрәҗәдә нәти­җәсез төзелүен искә тө­шер­де, – диде Константин Толкачев. — Мәктәпләрдә, ка­гыйдә буларак, бу эш белән шәхси сак предприятиеләре шөгыль­ләнә. Асылда, бу еш кына “вертушка”да утыручы пенсионер булып чыга, аның коралы да, тиешле әзерлеге дә юк. Ә еш кына мәктәп­ләрдә хәтта мондый сак та юк — үткәрү режимын вахтер тәэмин итә. Мәктәпләрне, балалар бакчаларын, башка белем бирү учреж­дение­лә­рен саклау кирәкле әзерлекне узган һәм, чыннан да, һөҗүмне һәм терактларны булдырмый кала алган кешеләр белән тәэмин ителергә тиеш дип саныйм. Һәм мондый сак өчен акча ата-аналардан җыелмаска, ә бюджетта салынырга тиеш. Мәгариф уч­реж­дениеләрен шул рәвешле саклау гади генә бурыч түгел, әмма аны хәл итәргә кирәк”.