“Волгоградка сәяхәт кылдык!”

Программа кысаларында балалар өчен илебезнең төр­ле шәһәрләренә мавыктыр­гыч һәм фәһемле сәяхәтләр оештыру күз уңында тотыла. “Балалар туризмы” буенча республикабыз укучы­лары берен­челәр­дән булып герой-шәһәр Волгоградка барып кайтты да инде.
— Мин Бүздәкнең 2нче мәктә­бендә алтынчы сыйныфта укыйм, — диде әлеге сәяхәттә булып кайткан Роксана Рамазанова. — Бу сәфәр күңелемдә онытылмаслык тәэссоратлар калдырды. Герой-шәһәр Волгоградта өч көн яшәдек. Аның барлык истәлекле урыннарын диярлек йөреп чыктык. Яуда һәлак булган батырлар мәйданы, Мәңгелек ут, Геройлар аллеясы, Мамай курганы, “Хәтер” музее, “Сталинград сугышы” панорамасы – болар барысы да Бөек Ватан сугышында каһар­маннарча башын салган сол­дат­ларыбыз­ның якты истәлеген мәң­геләш­терүче объектлар. Алар янында әйтерсең лә вакыт үзе туктый, җанны әйтеп аңлата алмаслык сагыш һәм илебез азатлыгын яулап һәлак булган батырларыбыз өчен горурлык тойгысы били.
Моннан тыш, безне Екатерина II заманында төзелгән борынгы архитектура музеена — “Иске Сарепта” тыюлыгына алып бардылар. Ул ХVIII-ХIХ гасырларда Русиянең фәнни, икътисади, мә­дәни үзәкләренең берсе булган. Идел – Дон елгалары­ның су каналына сәфәр дә кү­ңелдә якты хати­рәләр калдырды.
Роксана сөйләвенчә, аларны Волгоградта оркестр, җыр-моң белән зурлап каршы алганнар. Башкортстан укучылары делегациясендә 50 укучы булган. Алар — рес­публи­ка­бызның төрле районнарыннан җыел­ган фән олимпиадалары җиңү­челәре, укуда һәм спортта алдынгы 10-17 яшьлек балалар һәм үс-мерләр.
— Сәфәр вакытында яңа дуслар таптым, алар белән бүген дә телефон, скайп аша аралашып торабыз, — ди әңгәмә­дә­шем. — Волгоградтагы яшь­­тәш­ләребез, хушлашканда, безгә матур сувенирлар бүләк итте.
“Балалар туризмы” программасы арытаба да үсте­реләчәк. Киләсе елда аның кысаларында мәктәп укучылары өчен илебез башкаласы Мәскәүгә һәм Санкт-Петербургка мәдәни сәяхәтләр оештыру каралган.
— Минем фикеремчә, яшь­тәш­ләрем­нең барысы да иле­безнең данлы, шанлы тарих битләрен язган герой-шә­һәрләрдә булырга тиеш, мондый сәфәрләр гомер­леккә хәтергә балачакның иң чагу вакыйгалары булып уелып кала, Туган илебез өчен кирәк­ле шә­хес­ләр булып үсәргә этәргеч бирә, — ди Роксана.

Фото: Рамазановлар архивыннан