Чемпионат бай мирас калдырды

Салават индустриаль колледжында “Хезмәтне саклау” һәм “Җиңел автомобильләрне ремонтлау һәм аларга хезмәт күрсәтү” компетенцияләре буенча остаханәләр ачылды. 2021 елның августында узган “Яшь профессионаллар” (WorldSkills Russia) IX милли чемпионаты бай мирас калдырды, ул бөтен республика буенча “WorldSkills” стандартлары таләпләренә туры килә торган 100дән артык остаханәне заманча матди-техник база белән тәэмин итәргә мөмкинлек бирде.

— “Хезмәтне саклау” һәм “Җиңел автомобильләрне ремонтлау” компетенцияләре буенча алынган җиһазлар колледжга югары квалификацияле белгечләр әзерләүнең заманча таләпләренә, шулай ук эш бирүче сорауларына җавап бирә торган остаханәләр базасын булдыруны дәвам итәргә мөмкинлек бирде. Бу — укучыларның практик әзерлеген көчәйтү һәм белем бирүнең сыйфатын бәйсез бәяләү максатыннан кертелгән демонстрацион имтиханнарны уздыруга зур ярдәм, — дип билгеләп үтте мәгариф һәм фән министры Айбулат Хаҗин.

Модификацияләнгән остаханәләр демонстрацион имтихан тапшыру өчен дә, колледж базасында “WorldSkills” чемпионатларын әзерләү һәм уздыру өчен дә төп мәйданчык булып тора. Алдагы елда колледжда тагын 5 мәйданчыкны сертификацияләү планлаштырыла, ә 2023 елда барлык чыгарылыш сыйныф укучылары да демонстрацион имтихан тапшырачак. Бу максат белән тагын ике мәйданчык ачылачак.

Салават индустриаль колледжында остаханәләр ачу программасы актуаль мәсьәләләр буенча “түгәрәк өстәл” форматында фикер алышу белән тәмамланды, анда социаль партнерлык, “колледж-эш бирүче” системасында хезмәттәшлек мәсьәләләре, шулай ук белгечләрнең өзлексез һөнәри үсешенең бер өлеше буларак яңа ачылган остаханәләр базасында өстәмә һөнәри белем бирүнең роле каралды.

Фото: education.bashkortostan.ru