+21 °С
Болытлы
Мәгариф
17 март 2022, 06:05
“Ел укытучысы” бәйгесе дәвам итә
Кичә укытучылар Уфаның 84 нче Татар гимназиясендә дәрес күрсәтте.
“Ел укытучысы” бәйгесе дәвам итә
Уфада татар теле һәм әдәбияты буенча “Ел укытучысы-2021” республика конкурсының көндезге этабы дәвам итә. Беренче көнне Уфаның 65 нче Татар гимназиясендә 13 конкурсантның җидесе көндезге этапның “Укытучы-профи” дип аталган турында көч сынашкан иде. Кичә исә калган 6 бәйгече Уфаның 84 нче Татар гимназиясендә дәрес үткәрде.
— Светлана ЯМАЛЕТДИНОВА (Миякә районы, Әнәс мәктәбе) Фатих Әмирханның “Ай өстендә Зөһрә кыз” әсәре буенча дәрес үткәрде; Эльвира СӘЛИМГӘРӘЕВА (Балтач районы, Ялангач мәктәбе) Зәкәрия Әхмәровның “Агачлар да авырый” әсәре аша балаларны табигатькә сакчыл карарга чакырды; Алия НИГАМАЕВА (Нефтекама шәһәре, “Белем” полилингваль мәктәбе) укучыларны зат алмашлыклары белән таныштырды; Илзидә ХӘЙРУЛЛИНА (Әлшәй районы, Слак мәктәбе) үз дәресен тамырдаш сүзләргә багышлады; Эльмера МӘРДӘМШИНА (Илеш районы, Ишкар мәктәбе) Марсель Галиевның “Уйна әле” әсәрен бик үтемле итеп балаларга төшендерде; Айгөл НУРИСЛАМОВА (Кушнаренко районы, Иске Камышлы мәктәбе) укучыларга сүз төзелешен, тамыр һәм кушымча бәйләнешен аңлатты. Бәйгечеләр арасында Эльмера МӘРДӘМШИНА, Светлана ЯМАЛЕТДИНОВА кебек инде 20-25 еллык педагогик стажга ия булган тәҗрибәле укытучылар да, Алия НИГАМАЕВА кебек әле хезмәт юлына яңа аяк баскан яшьләр дә бар иде. Хәзер инде беренче этапның нәтиҗәләрен көтәргә кала, — дип белдерде жюри әгъзасы Илдус ФАЗЛЕТДИНОВ.
Читтән торып үткәрелгән һәм “Укытучы-профи” турларында иң яхшы күрсәткечләргә ирешкән укытучылар (аларның саны барлык конкурсантларның 30 процентыннан да кимрәк булмаска тиеш) “Укытучы-мастер” дип аталган икенче турга үтә. Монда алар осталык дәресе күрсәтергә һәм үзләре башкарган мәгариф проектын жюри хөкеменә чыгарырга тиеш.
“Укытучы-лидер” дип аталган соңгы турга бәйгечеләрнең бишесе үтәчәк. Алар “Татар теле һәм әдәбияты ел укытучысы” конкурсының лауреатлары дип игълан ителәчәк. Ә абсолют җиңүче “Пресс-конференция” сынавыннан соң билгеләнәчәк. Соңгы сынауда укытучыларга матбугат вәкилләре, укытучылар, хакимият вәкилләре белән мәктәп тормышы мәсьәләләрендә фикер алышырга, хәтта ки бәхәскә керергә туры киләчәк.
“Ел укытучысы”ның исеме 22 мартта билгеле булачак.
Илдус Фазлетдинов фотолары.
