Кадрлар монда әзерләнә

Республиканың урта һөнәри белем бирү системасын модернизацияләүгә 493,1 миллион сум акча бүленгән.
Башкортстан Башлыгы указы нигезендә агымдагы ел “Һөнәри белем бирүне модернизацияләү, лаеклы хезмәт шартлары һәм хезмәт династияләре елы” дип игълан ителде. Аны үткәрү буенча күп кенә чаралар планы расланган.

Агымдагы елда республика бе­рен­че­ләрдән булып Русиянең Мәга­риф һәм фән министрлыгы тарафыннан үткәрелә торган сайлап алу узды һәм “Машиналар төзү” тармагы буенча “Профессионалитет” федераль проектында катнашты. Шуның өчен белем бирү-җитештерү үзәге (кластер) булдыруга 100 миллион сум күләмендә федераль субсидия­ләр җәлеп ителгән. Республика бюджетыннан 114 миллион сум бүлеп би­релгән. Бу хакта оператив киңәш­мәдә мәгариф һәм фән министры Айбулат Хаҗин белдерде.
Проектны тормышка ашыруның төп принцибы — эш бирүче заказы буенча кадрлар әзерләү. “Профессионалитет” федераль проектында грант алучы — Уфа машиналар төзү колледжы, терәк эш бирүче — “Уфа моторлар төзү җитештерү берләш­мәсе” .
“Машиналар төзү” тармагы буенча белем бирү-җитештерү үзәген-дә машина төзү тармагы өчен кадрлар әзерләүче 5 колледж катнашачак. 1 сентябрьдән республикада “Машиналар төзү тармагы өчен кадрлар әзерләү үзәге” мәгариф-җитеш­терү үзәге (кластер) эшләячәк.
Мәгариф министры белдерүенчә, “Яшь профессионаллар” федераль проектын гамәлгә ашыру кысаларында агымдагы елда республика территориясендә 6 колледжда 12 заманча остаханә булдыру планлаштырыла, шуларның 6сы әзер инде. Федераль проектны гамәлгә ашыру кысаларында 2022 елда 79 остаханә булачак.
Моннан тыш, “Яшь профессионаллар” (WorldSkills Russia) IX Милли чемпионаты финалы мирасы матди базаны ныгытырга һәм тагын 109 ос­та­ханә булдырырга мөмкинлек бирде.
Колледжларның матди-техник базасын модернизацияләү максатында республика бюджетыннан субсидия­ләр рәвешендә грантлар бирү тәр­тибе эшләнгән, ул 5 колледжга республика бюджетыннан 30 миллион сум күләмендә субси­дияләр рәве­шендә грантлар бирүне күздә тота.
Республиканың урта һөнәри белем бирү системасын модерни­зацияләүгә агымдагы елда 493,1 миллион сум акча бүленгән. “Мәга­риф һәм фән министрлыгына караган дүрт колледж —236,1 миллион сумга, шулай ук Сәламәтлек саклау министрлыгы колледжлары 57 миллион сум күләмендә модерниза­цияләнәчәк. Әлеге эшләрне финанслау июльдә башланды, ремонт ноябрьгә тәмамланачак”, — дип билгеләде Айбулат Хаҗин.
Министр әйтүенчә, колледжларны яңарту 6 меңнән артык студентны сыйфатлы әзерләү өчен заманча шартлар булдырырга мөмкинлек бирәчәк.
– Шулай ук республикада дәүләт колледжлары укытучыларына һәм талантлы укучыларына да ярдәм итә­ләр. 1 сентябрьдән студентлар сти­пендияләре санын һәм күләмен арттырачакбыз, – дип өстәде Айбулат Хаҗин. – Укытучылар һәм производствога өйрәтү осталары өчен һәр ел саен 690 мең сум күләмендә 10 грант булдырылды.  
Моннан тыш, Башкортстанда урта махсус уку йортлары биналарына этаплап капиталь ремонт башланды. Алар арасында – Башкорт авыл хуҗалыгы һөнәри, Урал аръягы агро­сәнәгать, Дуван күппрофильле колледжлары. Шулай ук Сәламәтлек сак­лау министрлыгы карамагындагы һөнәри уку йортлары да модер­низацияләнә.
— Безгә колледжларыбызны саклап калу бик мөһим. Нәкъ менә шунда республика предприятиеләренә кирәкле эшче кадрлар әзерлибез, –дип билгеләп үтте республика җитәк­чесе Радий Хәбиров. — Колледжларны комплекслы рәвештә модер­низацияләргә кирәк —яңа җиһазлар урнаштырудан алып тулай торакларда лаеклы яшәү шартлары булдыруга кадәр.

Фото: vatandash.ru