+21 °С
Болытлы
Мәгариф
11 ноябрь 2022, 09:55
Сабыйлар туган телдә сөйләшә
Уфа районы Михайловка авылының “Ромашка” балалар бакчасында билингваль төркем ачылды.
Сабыйлар туган телдә сөйләшә
Агымдагы елда Уфа районының берничә балалар бакчасында татар-урыс телләрен өйрәнүгә нигезләнгән билингваль төркемнәр булдырылды. Аларның берсе Михайловка авылының “Ромашка” балалар бакчасында ачылды. Шушы көннәрдә без әлеге балалар бакчасы, коллективы һәм тәрбияләнүчеләре белән якыннан танышып кайттык.
1989 елда ишекләрен ачкан “Ромашка” балалар бакчасын 15 елдан артык яшь, эшлекле, бердәм, тырыш коллектив туплаган мөдир Диана Әхмәтдинова җитәкли. Моннан ике дистә ел элек биредә эш башлаган тәрбияченең мөмкинлекләрен, эшкә сәләтен тиз күреп алалар, билгеле. 2007 елның 1 сентябрендә, бакчаның элекке мөдире Мәсния Зыя кызының тәкъдиме белән, яшь белгечкә шактый зур коллективы, Шемәк һәм Комлыкүл авылларында ике филиалы да булган мәктәпкәчә белем бирү оешмасын җитәкләүне ышанып тапшыралар һәм ялгышмыйлар. Диана Руслан кызы, бакчаның элек-электән килгән күркәм традицияләрен дәвам итеп, аны район күләмендә үрнәкле итүгә зур өлеш керткән.
Бүген “Ромашка” балалар бакчасындагы 12 төркемгә 545 сабый йөри. Алар тәрбияле, сәламәт, төрле яклап сәләтле булып үссен өчен 53 хезмәткәр көч сала. Шуларның 29ы – педагоглар.
1989 елда ишекләрен ачкан “Ромашка” балалар бакчасын 15 елдан артык яшь, эшлекле, бердәм, тырыш коллектив туплаган мөдир Диана Әхмәтдинова җитәкли. Моннан ике дистә ел элек биредә эш башлаган тәрбияченең мөмкинлекләрен, эшкә сәләтен тиз күреп алалар, билгеле. 2007 елның 1 сентябрендә, бакчаның элекке мөдире Мәсния Зыя кызының тәкъдиме белән, яшь белгечкә шактый зур коллективы, Шемәк һәм Комлыкүл авылларында ике филиалы да булган мәктәпкәчә белем бирү оешмасын җитәкләүне ышанып тапшыралар һәм ялгышмыйлар. Диана Руслан кызы, бакчаның элек-электән килгән күркәм традицияләрен дәвам итеп, аны район күләмендә үрнәкле итүгә зур өлеш керткән.
Бүген “Ромашка” балалар бакчасындагы 12 төркемгә 545 сабый йөри. Алар тәрбияле, сәламәт, төрле яклап сәләтле булып үссен өчен 53 хезмәткәр көч сала. Шуларның 29ы – педагоглар.
“Ромашка” балалар бакчасы әти-әниләр арасында, беренче чиратта, тәҗрибәле тәрбиячеләре белән дан тота. Моннан кызлар һәм малайлар мәктәпкә ныклы әзерлек белән бара, алар һәрьяклап үсешсен өчен тәрбиячеләр зур көч сала. Сүз уңаеннан, биредә эшләүче педагогларның күпчелеге ун ел һәм аннан да күбрәк хезмәт стажына ия. Күпләр кулларына диплом алгач та шушында эш башлаган һәм хезмәт кенәгәсендә бер генә язу булуы белән хаклы рәвештә горурлана.
– Безнең коллективта чын-чынлап балалар яратучы, үз һөнәренә мөкиббән кешеләр эшли. Алар вакыт белән исәпләшми, бөтен энергиясен эшкә бирә. Әйтик, Зөлфия Галиуллина, Елена Казакова, Людмила Әхтәриева, Гөлнара Зәйнуллина кебек тәҗрибәле тәрбиячеләребез, логопедлар Ирина Гайнетдинова һәм Марина Егорова, педагог-психолог Бүләк Кирәева, өлкән тәрбиячебез Гөлназ Ибраһимова, музыкаль җитәкчеләребез Светлана Зорина һәм Айсылу Фәррахова – нәкъ шундыйлардан. Әйткәндәй, Светлана Ивановна агымдагы елда “Мәктәпкәчә белем бирү оешмасының ел педагогы” конкурсында лауреат булды, – ди, коллективы белән горурланып, Диана Руслан кызы.
Тәрбиячеләр балалар бакчасы һәр сабый өчен уңайлы, үз булсын, алар һәрьяклап үсешсен, мәктәпкә ныклы әзерлек белән барсын, ана телен, туган җиренең үзенчәлекләрен, гореф-гадәтләрен белеп үссен өчен тырыша. Биредә күптән түгел оештырылган “Йолдызчыклар” билингваль төркеме дә – әнә шушы күркәм хезмәтнең нәтиҗәсе. 34 бала йөргән әлеге төркемне тәҗрибәле тәрбиячеләр Зөлфия Галиуллина һәм Розалия Галиева җитәкли.
– Сентябрьдә ике телне үзләштерүгә нигезләнгән билингваль төркем булдырдык. Ата-аналар да бу яңалыкны шатланып кабул итте. Хәзер күпләрдә милли үзаң уяна башлады. Ата-аналар балаларының туган телдә сөйләшә, шигырьләр сөйли, җырлый белүен тели. Төркемдә эш башлауга әле ике генә ай үтсә дә, балаларның кызыксынуын, беренче уңышларын күреп сөенәбез, – ди җитәкче.
Әлбәттә, бүген телне саклау, аны балаларга җиткерү җиңел-ләрдән түгел. Тәрбиячеләр дә шундый фикердә. Ләкин яңа кызыклы алымнар кулланып, бу эшкә балаларны гына түгел, әти-әниләрне дә җәлеп итеп, яхшы нәтиҗәләргә ирешергә мөмкин.
– Балаларның кайберләре “Көз бәйрәме”ндә татар телендә кыска гына шигырьләр сөйләп күрсәтте. Телне бөтенләй аңламаган Ромабыз да хәзер унга кадәр татарча саный белә, – ди “Йолдызчыклар” төркеме тәрбиячесе Зөлфия Тәлгать кызы. – Чынлыкта, балалар сүзләрне тиз ота. Аларның күзләрендәге очкын, кызыксынучанлык безне дә илһамланып эшләргә дәртләндерә. Җәйге ялга таралыр алдыннан әкият сәхнәләштереп, шушы вакыт эчендә өйрәнгәнне, һөнәр-ләребезне күрсәтербез дигән ниятебез бар.
– Балалар кызыклы уеннар, диалоглар корганны бик ярата. Без саф һавада булган вакытта да аларның сүз байлыгын арттыру, телен шомарту өстендә эшлибез, – дип сүзгә кушыла Розалия Галиәхмәт кызы.
Алтыда белгән бала ана телен алтмышта да онытмас, дигән борынгылар. “Ромашка” балалар бакчасына йөрүче кызлар һәм малайлар да тәрбияче апалары салган якты эздән атлап, Тукай телендә сөйләшеп, тәртипле, әдәпле, туган телле булып үссен!
