Иң яхшы укытучылар династияләре билгеләнде

Башкортстан башкаласына илнең төрле төбәкләреннән 20 династия вәкилләре килгән - Саха Республикасыннан (Якутия) Краснодар краена кадәр. Конкурс Русия Мәгариф министрлыгы ярдәмендә "Педагог һәм остаз елы" кысаларында уздырыла.

"Педагогия династияләре - безнең илнең байлыгы. Без дә бу күркәм һөнәргә мәхәббәтне балачактан ук тәрбияләп, буыннан-буынга тапшырыла торган гаиләләр белән горурланабыз. "Педагог һәм остаз елы"нда Русия Федерациясе Мәгариф министрлыгы «Русиянең педагогик династияләре» проектын башлап җибәрде, ул безнең зур илебезнең барлык төбәкләреннән 700 гаиләне берләштерде.

М.Акмулла исемендәге Башкорт дәүләт педагогия университеты бәйгесе дә күркәм традициягә әверелде. Анда укытучы гаиләләре үзләренең һөнәри тәҗрибәләрен тәкъдим итә. Быел аңа Русиянең 78 төбәгеннән, шул исәптән яңа төбәкләрдән, 633 гаилә гариза биргән. Бу гаиләләр турында кече ватаннарда гына түгел, аларның төбәкләреннән читтә дә киң билгеле булырга тиеш. Бу - педагогик һөнәрнең абруен күтәрүгә тагын бер мөһим адым", - дип ассызыклады Русия мәгариф министры Сергей Кравцов.

"Гасырдан гасырга" номинациясендә абсолют җиңүче Псков өлкәсеннән 565 ел стажлы Любавин-Страшновлар династиясе булды, аны Наталья Любавина тәкъдим итте. Һәр өч номинациядә лауреатлар билгеләнде. Бәйгедә Башкортстан Республикасын күрсәткән Хисмәтуллин-Булатасовлар династиясе II дәрәҗә лауреат исемен алды.

Башкортстан Республикасының мәгариф һәм фән министры вазыйфасын башкаручы Илдар Мәүлетбирдин үзенең укытучылар династиясе турында сөйләде.

"Ниһаять, илдә укытучы һөнәренең абруе кайта, законнарда "мәгариф хезмәте" төшенчәсе барлыкка килде. Ниһаять, мәктәпләргә тәрбия һәм мәгърифәт кире кайтты. Һәм династияләр конкурсы - нәкъ менә шушы кыйммәтләрне күрсәтүче бәйге", - диде ул.