-3 °С
Ачык
Барлык яңалыклар
Мәгариф
20 август , 10:05
Мәгариф – күтәрелештә!
Стәрлетамакта Башкортстан Башлыгы Радий Хәбиров катнашлыгында укытучыларның республика август киңәшмәсе үтте. 17 августта Стәрлетамакта үткән Мәгариф буенча республика август киңәшмәсе алдыннан Башкортстан Башлыгы Радий Хәбиров 1нче гимназиянең яңартылган корпусын карады. Элек анда “Каенкай” шифаханә-профилакторие булган. Бина 2024 елда төзекләндерелгән, ул 750 укучыны һәм 120 балалар бакчасында тәрбияләнүчене кабул итәчәк. Мәктәп 2 сентябрьдә ишекләрен ачачак.
Мәгариф – күтәрелештә!
Гимназиядә Радий Хәбиров стоматология кабинетын карады. Заманча җиһазландырылган бинада табиблар балаларны һәм укытучыларны кабул итәчәк. Шулай ук республика җитәкчесе актлар залында, башлангыч сыйныф, хезмәт һәм психологик ярдәм бүлмәләрендә булды.
“Мәгариф” гомумдәүләт проекты кысаларында мәктәптә яңа җиһазлар: мобиль һәм стационар информатика кабинетлары, интерактив панельләр һәм лазер принтерлары урнаштырылган. Радий Хәбиров биналарны җиһазландыру белән танышты, анда укучылар IT-өлкәдә беренче адымнарын ясаячак.
Мәгариф буенча республика август киңәшмәсе алдыннан Радий Хәбиров шулай ук мәгариф учреждениеләре директорларына 17 яңа автобустан ачкычлар тапшырды.
– 1 сентябрь алдыннан без мәктәп автобуслары тапшыруга бик шат. Уку көне республикадагы 52 меңнән артык бала өчен мәктәп автобусыннан башлана. Иң мөһиме — аларның хәвефсезлеге. Ә хәвефсезлек – ул яңа, яхшы автобуслар һәм профессиональ машина йөртүчеләр. Шуңа күрә яңа техниканың ачкычларын бик теләп тапшырам. Юлда аварияләрсез йөрүегезне телим, чөнки мәктәп автобусы водителенең эше бик җаваплы, – диде Радий Хәбиров.
2019-24 елларда республиканың мәктәп автопарклары 700 автобуска тулыланган. Шуларның 253е төбәк бюджеты исәбенә һәм 447се федераль акчага сатып алынган.
Радий Хәбиров мәктәп белеме һәм туклануны оештыру казанышлары күргәзмәсен дә карады. Ул Стәрлетамакның 23нче полилингваль күппрофильле мәктәп базасында оештырылган, анда Мәгариф буенча республика киңәшмәсенең пленар утырышы узды.
Төбәк җитәкчесе “Иң яхшы мәктәп ашханәсе-2024” Бөтенрусия конкурсының республика этабында җиңүчеләр — туклану операторлары күргәзмәсе белән танышты.
Шулай ук Башкортстан Башлыгына республика мәктәп мәгарифе казанышлары күргәзмәсен тәкъдим иттеләр.
Башкортстан Башлыгы, шулай ук, 23нче полилингваль күппрофильле мәктәпне карады, ул “Мәгариф” гомумдәүләт проекты кысаларында 2019 елда ачылган. Биредә ике сменада 2607 бала белем ала.
Радий Хәбиров мәгариф буенча республика киңәшмәсенең пленар утырышында чыгыш ясады. Быелгы август киңәшмәсенең темасы – “Төбәк мәгариф системасының стратегик ориентирлары”.
Башкортстан Башлыгы үз чыгышында республика мәгариф системасын үстерүдәге төп бурычларны билгеләде. Педагогик берләшмә эшчәнлегендәге төп өстенлекләрнең берсе – махсус хәрби операциягә ярдәм итү.
– Укытучылар өчен бу барыннан да элек — безнең яшьләрнең акылы һәм рухы өчен көрәш. Чөнки СВО, асылда, илебез һәм безгә дошман булган Көнбатыш цивилизациясе арасында глобаль конфликтлы күренешләрнең төп ноктасы булып тора, – диде Радий Хәбиров. – Без хәрби әзерлек һәм патриотик тәрбия өчен шактый үсешкән инфраструктура әзерләдек. Бу – “Патриот” паркы. Быел Стерлебаш районындагы “Орлёнок” балалар лагере базасында “Патриот”ның филиалын файдалануга кертәчәкбез. Киләсе елда Кыйгы районында тагын бер филиалны, ә соңрак Баймак районында да эшләтеп җибәрәчәкбез. Бурыч – барлык өлкән сыйныф укучылары һәм колледж студентлары “Патриот” паркында биш көнлек курслар узарга, кирәкле белем алырга тиеш.
Башкарылган эшкә йомгак ясап, Башкортстан Башлыгы билгеләп үтүенчә, мәгариф сыйфаты белән идарә итүнең төбәк механизмнарын бәяләү буенча республика төбәкләр рейтингында 2020 елдагы 71нче урыннан 2022 ел нәтиҗәләре буенча 17нче урынга күтәрелгән. 2024 елда Башкортстан Идел буе федераль округының мәктәп укучылары арасында интеллектуаль олимпиада нәтиҗәләре буенча лидерлар өчлегенә керде, мәктәп укучылары арасында Бөтенрусия олимпиадасында җиңүчеләр һәм призёрлар саны буенча алтынчы урынны алды.
2024 елда Башкортстанда БДИ нәтиҗәләре буенча йөз баллы эшләрнең рекордлы саны теркәлде – 155. Бу үткән ел күрсәткече белән чагыштырганда, ике тапкырга диярлек күбрәк. Шунысы мөһим, соңгы биш елда республика БДИны объектив үткәрүдә “яшел зонада” кала.
– Салган тырышлыгыбыз мәктәпләрдә белем бирү сыйфатының яхшыруына китерә, – диде Радий Хәбиров. – Бу шул исәптән мәгариф системасының матди базасын үстерү буенча үткәргән зур эш нәтиҗәсе. Биш ел эчендә 22 меңнән артык урынга 44 мәктәпне файдалануга тапшырдык. Берләштерелгән объектларны исәпкә алып, 9173 урынга 65 балалар бакчасы файдалануга тапшырылды. Быел Уфада “Йондоз” белем бирү үзәген, Иглин районының Иглино авылында 1225 урынлык мәктәпне һәм Туймазыда 500 урынлык 5нче урта мәктәпне файдалануга тапшырачакбыз. Концессион килешүләр кысаларында җиде зур мәктәп төзибез. Президент программасы ярдәмендә ике ел эчендә 53 мең бала укыган 140 мәктәп бинасына капиталь ремонт ясадык. Бу максатларга федераль бюджеттан 6,5 миллиард сум, республика казнасыннан 1 миллиард сумнан артык акча юнәлтелде. Быел 31 мәктәпне ремонтлый башладык, шуларның алтысы быел ук, ә 25е киләсе елга ишекләрен ачачак.
Башкортстан Башлыгы билгеләп үтүенчә, Русия Президенты Владимир Путин балалар бакчаларын төзекләндерү буенча федераль программа башлангычы белән чыкты. Республика анда катнашуга 159 гариза биргән дә инде.
– Башкортстанның 19 колледжы “Профессионалитет” федераль проектында катнаша. Шунда ук зур акчалар килә, һәм уку йорты тулысынча үзгәрә – экосистема, экстерьер, интерьер, уку базасы яңартыла, яңа остаханәләр, лабораторияләр барлыкка килә, – диде Радий Хәбиров. – Сәнәгать предприятиеләренә эшче куллар җитешми. Ә колледжлар – икътисадны кадрлар белән турыдан-туры тәэмин итүче. Шуңа күрә хәзер бу стратегик мөһим юнәлеш.
Республика җитәкчесе полилингваль белем бирүне үстерү мәсьәләләрен аерым игътибар үзәгенә алды. Башкортстанда урыс, башкорт, татар һәм мари телләрендә белем бирүче сигез полилингваль мәктәп эшли. Планда – чуваш һәм удмурт гимназияләрен эшләтеп җибәрү. Төбәк Башлыгы республиканың Финанс министрлыгына Нефтекамада полилингваль күппрофильле мәктәптә интернат булдыру өчен акча табарга кушты.
Педагогларның хезмәт шартларын яхшырту турында сөйләгәндә, Радий Хәбиров 2025 елдан укытучыларга берлектәге финанслау шартларында республиканың шифаханә-курорт учреждениеләренә ике атналык юллама бүлергә тәкъдим итте. Республика җитәкчесе профильле министрлыкларга бу мәсьәләне хәл итәргә һәм бер ай эчендә тәкъдимнәрен тапшырырга кушты.
Федерация Советының фән, мәгариф һәм мәдәният комитеты рәисе Лилия Гомәрова мәгариф өлкәсен үстерү буенча мөһим законнар чыгару башлангычлары турында сөйләде.
Республиканың мәгариф һәм фән министры Илдар Мәүлетбердин чыгышында тармак үсешенә нәтиҗә ясады, 2030 елга кадәр бурычларны билгеләде.
Уфа дәүләт нефть техник университетының 83нче Инженерлык лицее директоры Алла Цыбина педагоглар исеменнән федераль үзәккә һәм Башкортстан җитәкчелегенә, Дәүләт җыелышы-Корылтайга һәм муниципалитетлар хакимиятләренә төбәкнең мәгариф системасын үстерүгә зур игътибар бирүләре өчен рәхмәт белдерде.
Киңәшмә азагында Радий Хәбиров педагогик берләшмәгә конструктив диалог өчен рәхмәт белдерде, дәүләт бүләкләре, шулай ук, “Башкортстанның ел укытучысы” конкурсы лауреатларына һәм финалистларына премияләр тапшырды.
Төбәк җитәкчесе билгеләп үтүенчә, дискуссия барышында әйтелгән барлык йөкләмәләр йомгаклау протоколында чагылыш табачак. Радий Хәбиров мәгариф буенча киләсе ки- ңәшмәне шулай ук күчмә итәргә һәм аны Бөредә уздырырга тәкъдим итте.
– Асылда, хәзер күптәнге традицияне яңартабыз, төрле районнарда җыелабыз. Бу муниципалитетлар үсешенә билгеле бер этәргеч бирә, – диде Радий Хәбиров журналистлар белән әңгәмәдә. – Һәм, әлбәттә, укытучыларның һәм район мәгариф бүлекләре башлыкларының территорияләрнең уңышлы тәҗрибәсе белән танышулары, аны үзләрендә таратулары мөһим.
Киңәшмәдән соң Радий Хәбиров Стәрлетамак күппрофильле һөнәри колледжында булды, яңартылган корпусның уку лабораторияләрен карады һәм “Профессионаллар” чемпионат хәрәкәте җиңүчеләре белән очрашты.
Фәнүз ХӘБИБУЛЛИН.
Читайте нас:
© 2019-2024 “KizilTan” электрон басмасы элемтә, мәгълүмат технологияләре һәм киңкүләм коммуникацияләр өлкәсендә күзәтчелек буенча федераль хезмәт тарафыннан теркәлгән.
Теркәлү саны: 2019 елның 24 маендагы Эл сериясе № ФС 77-75682.
Басманың яшь категориясе 12+
___________________
Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)
Регистрационный номер: серия Эл № ФС 77-75682 от 24 мая 2019 г.
Возрастная категория издания 12+
Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.
____________________
УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».
Баш мөхәррир Фаил Камил улы Фәтхетдинов.
Кабул итү бүлмәсе телефоны: 8 (347) 272-13-61.
___________________
Главный редактор: Фатхтдинов Фаил Камилович.
Телефон приемной: (347) 272-13-61.
Телефон
8(347)272-13-61
Электрон почта
kyzyltan@mail.ru
Адресы
450079, Уфа шәһәре, Октябрьнең 50 еллыгы урамы, 13 нче йорт
Реклама хезмәте
8(347)272-62-27
Хезмәттәшлек
8(347)272-62-27