Уфада студентлар биотехнология серләрен өйрәнәчәк

17 мартта М. Акмулла исемендәге Башкорт дәүләт педагогия университетында «Тереклек системалары биотехнологиясе» лабораториясе презентациясе узды, ул бу атнада ачылачак һәм үз эшен башлаячак. Ул Евразия фәнни-белем бирү үзәге базасында эшләячәк.

Дәүләт җыелышы-Корылтай депутаты, М. Акмулла исемендәге БДПУ ректоры Салават Сәгыйтов яңа лабораториянең әһәмиятен ассызыклады:
“Бу – гуманитар юнәлештәге университет өчен бик мөһим адым. Безнең университет – педагогика гына түгел, киңкырлы югары уку йорты. Бүген без гуманитар белем бирүне яңа дәрәҗәгә чыгарабыз. Бу фән һәм практика берләшкән урын булачак. Студентлар, заманча җиһазларда эшләп, киләчәктә зур проектларда катнаша алачак. Бу яңа лаборатория – инновацион мәйданчык, ул университетның үсеш юнәлешен күрсәтә”.

Проектның партнёры – «ЭДВИС» компаниясе. Ул Акмулла университеты белән 30 елдан артык хезмәттәшлек итә һәм белем бирү процессын үстерүгә зур өлеш кертә.

Шулай ук студентларның иҗади проектлары тәкъдим ителде. Алар 6нчы һәм 13нче уку корпуслары арасындагы мәйданны яңарту концепциясен эшләде.
“Без заманча, яшьләр өчен кызыклы, шул ук вакытта тарихи кыйммәтләрне саклаган концепцияләр булдыру яклы,” – дип билгеләп үтте доцент Айгөл Шәрипова.

Проект кысаларында скульптуралар реставрацияләнәчәк, эргономика камилләштереләчәк, ял зонасы булдырылачак. Университет студентлары шәһәр халкы һәм туристлар өчен яңа иҗади киңлек тәкъдим итә.

Фото: Алия Кашафутдинова