Яңа уку елында безне нәрсәләр көтә?

Киңәшмәне ачып, беренче вице-премьер Урал Килсенбаев катнашучыларны ачык диалогка, эш моментлары һәм кичектереп булмый торган мәсьәләләр турында фикер алышырга чакырды.

— Без яңа уку елына әзерләнәбез. Традиция буенча, август киңәшмәсе кысаларында республика Башлыгы мәгариф өлкәсендә төп юнәлешләрне бирә: нәрсәгә игътибар итәргә, кичекмәстән нинди карарлар кабул итәргә кирәк, - диде ул.

2023 елда мәктәпләргә 54 мең беренче сыйныф укучысы килгән, ә быел 44 мең бала киләчәк. Ике ел эчендә - минус 10 мең. Уфа һәм Уфа районыннан тыш, укучылар саны буенча динамика бик үк яхшы түгел. Шул ук вакытта финанслау терәк мәктәпләргә, мәсәлән, үсеш перспективалары булган район үзәкләренә юнәлтеләчәк.

Башка мөһим мәсьәләләр арасында - уку кабинетларының җиһазландырылуы. Моңа федераль акчалар да, республика субсидиясе дә юнәлтеләчәк.

Кадрларга килгәндә, барыннан да бигрәк мәктәпләрдә физика һәм математика укытучылары җитми. Балалар саны кимү аркасында эшсез калган башлангыч сыйныф укытучылары, яңадан әзерлек узып, предметникка күчә алачак.

Ә максатлы белем алуга килешү төзегән педагогик вуз студентлары Башкортстан Башлыгы стипендиясен алачак. Ул беренче курста 5 мең сумнан 3-4нче курсларда 10 мең сумга кадәр тәшкил итәчәк.

Киңәшмәдә катнашучылар, шулай ук, укытучыларга артык бюрократик йөкләнеш булуга борчылу белдерде. Педагоглар укыту процессына күбрәк вакыт бүлә алсын өчен профильле булмаган отчетлар күләмен кыскарту турында карар кабул ителде.

Фото һәм оригиналь текст: resbash.ru