“Сез – безнең киләчәгебез!”

Төбәктә яшь галимнәр һәм тикше­ренүчеләргә һәрьяклап ярдәм күр­сә­тү – республикада өстен­лекле юнәлешләрнең берсе. Чөнки XXI гасырда фән – социаль-икътисади алгарышның нигезе. Яшьләрнең фикере, инновацияләргә омтылышы һәм эзләнүләре төбәкнең килә­чәген билгели.

Грантлар һәм премияләр
Республикада яшь галимнәр өчен махсус грантлар системасы булдырылды. Соңгы 4 елда республика фәнне үстерүгә 900 миллион сум акча бүлгән. Сүз тикшеренү эшчәнлегенә грант ярдәме күрсәтү, заманча лабораторияләр булдыру, яшь галимнәрнең илнең әйдәп баручы югары уку йортларында стажировкаларын оештыру һәм аларның торак шартларын яхшырту турында бара.

Әлеге ярдәм төрле дәрәҗәдәге яшь тикшеренүчеләргә адреслана:
аспирантларга – ел саен 500 мең сум күләмендә;
фән кандидатларына – ел саен 1 миллион сум;
фәнни лабораторияләргә – 25 миллион сумга кадәр.

Моннан тыш, “Елның яшь галиме” премиясе гамәлгә кертелде. Ел саен 7 яшь галим 150 мең сум күләмендә бүләк ала. Мәктәп укучылары да игътибардан читтә калмый: БДИда иң югары балл җыеп, Евразия НОЦына укырга кергән очракта, алар 150 мең сум премия ала.

УУНиТның яшь профессоры Гөлназ Шәйхетдинова болай ди: “Безнең буын өчен мондый грантлар – зур этәргеч. Дәүләт ярдәме безгә көч һәм ышаныч өсти. Бу – фән юлында калырга зур этәргеч”.

Социаль ярдәм һәм торак
Яшь галимнәр өчен иң авыр мәсьәләләрнең берсе – торак. Республика җитәкчелеге моны яхшы аңлый һәм махсус торак программаларын гамәлгә кертә. Яшьләр өчен ипотека шартлары йомшартыла, кайбер галимнәргә өстәмә субсидияләр дә бирелә.

Башкорт дәүләт медицина университеты доценты Илдар Мусин үз тәҗрибәсе белән уртаклаша: “Фәнни эш белән шөгыльләнүчеләргә торак шартларын яхшырту программасы бик вакытлы һәм әһәмиятле ярдәм булды. Университетыбыз да хезмәткәрләренең торак шартларын яхшырту мөмкинлеге алды”.

Кампуслар һәм инфраструктура
2024 елда Уфа кампусының беренче чираты файдалануга тапшырылды. Биредә заманча аудиторияләр, лабораторияләр, стартап-студияләр һәм иҗади мәйданчыклар урнашкан. Яшьләр монда белем ала, фәнни тикшеренүләр үткәрә, проектлар эшли. Агымдагы елда “Геном үзәге” дә эшли башлады. Анда геномика, биоинформатика, робототехника өлкәсендә алдынгы тикшеренүләр алып барыла.

БАШКОРТСТАН БАШЛЫГЫ РАДИЙ ХӘБИРОВ: “ВУЗАРА КАМПУС 4,5 МЕҢ СТУДЕНТ ӨЧЕН ЯҢА, ЗАМАНЧА БЕЛЕМ БИРҮ ҺӘМ ИҖАТ МӘЙДАННАРЫ БУЛАЧАК. БУ – ЯШЬЛӘРНЕ ҖӘЛЕП ИТҮ ҺӘМ ТӨБӘКТӘ КАЛДЫРУ ӨЧЕН КӨЧЛЕ ЭТӘРГЕЧ. МИН ЫШАНАМ: ӘЛЕГЕ КАМПУСТА ТУГАН ФИКЕРЛӘР ҺӘМ ПРОЕКТЛАР РЕСПУБЛИКАБЫЗНЫ АЛГА ӘЙДӘЯЧӘК”.

Халыкара тәҗрибә һәм стажировка
Яшьләр өчен иң зур мөмкинлекләрнең берсе – чит илләрдә стажировкалар. Республика бюджетыннан алар өчен махсус квоталар бүленә. Галимнәр дөньядагы алдынгы лабораторияләрдә эшли, аннан тәҗрибәсен Башкортстанга алып кайта.
Республикада гамәлдә булган лабораторияләр, стажировкалар, грантлар һәм торак программалары яшьләргә фән юлын сайларга ышанычлы этәргеч бирә.

БАШКОРТСТАН БАШЛЫГЫ РАДИЙ ХӘБИРОВ: “БЕЗ ЯШЬ ГАЛИМНӘРГӘ ЗУР ХӨРМӘТ БЕЛӘН КАРЫЙБЫЗ. АЛАР – БЕЗНЕҢ КИЛӘЧӘК. БЕЗ АЛАР ӨЧЕН ШАРТЛАР БУЛДЫРАБЫЗ ҺӘМ БУЛДЫРАЧАКБЫЗ. ЧӨНКИ ФӘНСЕЗ АЛГАРЫШ БУЛМЫЙ. ӘГӘР ЯШЬЛӘРЕБЕЗ ФӘН ЮЛЫН САЙЛЫЙ ИКӘН – ДИМӘК, РЕСПУБЛИКАБЫЗНЫҢ КИЛӘЧӘГЕ ЫШАНЫЧЛЫ”.

Башкортстанда яшь галимнәргә ярдәм – ул киләчәккә иң зур инвестиция!