+20 °С
Болытлы
Бөек Җиңүгә - 80 ел
9 Май 2025, 12:15
Уфада “Үлемсез полк” йөреше булды
9 майда Уфада Бөек Җиңүнең 80 еллыгы уңаеннан “Үлемсез полк” колоннасы тантаналы йөреше узды. Октябрь проспекты буенча Бөек Ватан сугышында катнашучыларның, тыл хезмәтчәннәренең, блокадникларның һәм хәрби бурычларын үтәгәндә һәлак булган хәрбиләрнең фотосурәтләре белән республиканың 200 меңгә якын кешесе узды.
Уфада “Үлемсез полк” йөреше булды
Башкортстан Башлыгы Радий Хәбиров картәтисе - фронтовик Барый Латыйп улы Хәбировның портретын “Үлемсез полк” колоннасында күтәреп барды, аны армиягә 1941 елның августында чакырганнар. Ул 206нчы аерым линияле элемтә батальонының телеграф-төзелеш ротасы составында хезмәт иткән, яраланган, медальләр, шул исәптән “Ленинград оборонасы өчен” медале белән бүләкләнгән.
“Үлемсез полк” акциясе Уфада уникенче тапкыр узды. Йөрештә катнашучылар 6 километр озынлыктагы маршрут буенча үтте.
Журналистлар белән әңгәмәдә Радий Хәбиров “Үлемсез полк” халык хәтеренең мөһим өлеше булып кала һәм республика халкы өчен берләштерүче роль уйный, дип ассызыклады.
- Һәр кешенең үз герое – картәтисе, әтисе бар. Һәм без бу акциядә катнашканда, аларны искә алабыз. Әйтерсең лә, без аларга хәтер һәм рәхмәт сигналлары җибәрәбез - бу үткәннәр белән берләшү мизгеле, - дип билгеләде республика җитәкчесе.
2025 елда акция әлеге форматта уза. Башкортстан Башлыгы билгеләп үткәнчә, бу җитди әзерлек, һәм иң мөһиме - халыкның фикерен исәпкә алу аркасында мөмкин булды.
- Хәл гади түгел - барлык хезмәтләр, бигрәк тә көч структуралары хезмәткәрләре актив эшли. Хәтта көнкүреш детальләрен дә уйларга кирәк, йөрештә меңләгән кеше катнаша бит, - дип ассызыклады Радий Хәбиров. - Җиңүнең 80 еллыгы - үзенчәлекле дата. Без анализ ясадык, һәм билгеле булды - кешеләр чыннан да бу акцияне сагындылар. Алар сугыштан кайтмаган туганнарына үзләренең мәхәббәтләрен һәм ихтирамнарын белдерәләр.
Фото: glavarb.ru
