Ир икән – ир булсын!

Альфонс ирләрне берничә төргә бүләләр:

Эш сөймәүчеләр

Мондыйлар эшләргә яратмый. Тормышның ул эшлә­мәсә дә барганын белгәч, бөтенләй ялкауга әйләнә, чөнки ул хатынына бик ышана. Кайбер булдыклы хатыннар үзләре ирләрен җебегәнгә әйләндерә.

Мескенләнүчеләр

Андыйлар гел зарланып тора. Эш юк, акча бирмиләр, диләр. Ә үзләре ял итәргә ярата. Дуслар белән бергә җыелсалар, аларның акча янчыклары өендә кала. Андыйлар хатын-кызның күңелен яулар өчен башта бүләкләр бирә, ә аннары җилкәсенә менеп утыра.

Остарган альфонс

Андый ирләр үз эшен бик оста башкара. Иң кәттә машинада йөри. Үз-үзен гел формада тота. Байларча кылана. Затлы шәрабларны белә, хатын-кызга кирәкле кыйммәтле косметикаларның маркасы белән кызыксына. Кыскасы, гүзәл затларга үзен шулкадәр белемле, затлы кеше итеп күрсәтә. Баксаң, аның бернәрсәсе дә булмый. Ул тәмле теле белән хәлле хатын-кызларның күңеленә кереп оялый.

Интернет-альфонс

Социаль челтәрдә хатын-кызны үз кармагына төшереп утыручы ирләр төре бу. Сез аларны бер дә күрмәскә мөмкин. Әмма алар күңеле­гезне СМСлар белән яулап ала. Матур сүзләр белән алар сезнең кредит картасы номерларын да сорап алырга мөмкин. Шул рәвешле ул үзенә кирәк бөтен мәгъ­лүматны җыячак. Үзен корбан итеп күрсәтергә дә мөмкин. Янәсе, дустыннан акча алып торган. Хәзер кайтармаса, аны зур бәла көтә, дияргә мөмкин.

Альфонс ирләрне ничек танырга соң?

Андыйлар хатын-кыз белән танышкач, бик тәф­силләп аның кайда эшләвен, уңышлары турында да сораша. Еш кына тормышыннан зарланырга мөмкин. Гаиләсе юклыгына да хатынын гаеп­ләп куячак. Ә хатын-кыз зарын сөйләсә, аны ишетми дә, ярдәм итәргә дә ашыкмый. Кыскасы, андыйлар яныннан тизрәк ычкынырга кирәк. Альфонслар, бай хатын-кызның җаена гына торып, ул нәрсә теләсә, шуны эшләп, аның күңелен яулый. Тик беркатлы булырга ярамый. Җебегән ирләргә кызыкмагыз, ир икән – ир була белсен инде ул.