Балыкны тоту гына түгел...

* Чи ба­лык­ны ит, колбаса, сыр янын­да сакларга ярамый. Чи балыкны пешергәч, микроблары юкка чыга, ә менә янында торган продуктлар авыру микрофлора белән зарар­­ланырга мөмкин.

* Туңдырылган балыкны һәм пешереп туңдырылган балык итен сакларга уйласагыз, чиста кәгазьгә төреп, аны туң­дыргычка урнаштырыгыз. Әгәр балык туң­дырыл­маган икән, ул чакта эчен-тышын чистартып, пешер­гәнче суыкта тотыгыз.

* Балык ризыкларын, консерваларны, уылдык­ны, тозлы, киптерелгән һәм ысланган балыкны суыт­кычның аскы киш­тәсендә, туң­дыргычтан ераграк урында сакларга киңәш ителә.

* Балыкны әзерләү алдыннан аның яхшы сыйфатлымы икәнен белергә кирәк. Моның өчен аны су тутырылган таска салыгыз: балык төпкә төшсә, ул иске түгел дигән сүз. Күптән түгел тотылган балыкның тәңкәләре ты­гыз, шома һәм ялтырап тора, күзләре ачык, эче кабармаган була.

* Туңдырылган балыкны салкын суда тотып та эретергә мөмкин. Минераль матдәләре югалмасын өчен 1 литр суга 7-10 грамм исәбеннән тоз кушарга кирәк.

* Балыктан саз исе кил­мә­сен, дисәгез, аны тозлы салкын суда юыгыз.

* Балык чистарту бик җиңел­дән түгел, ул кулдан шумасын өчен бармакларны тозга маныгыз.

* Балыкны кискәндә сытарга, бөгәргә ярамый, чөнки аның суты агып бетә.

* Кыздырганда ба­лык таралып бетмәсен өчен башта аны онда әвәләргә, тугл­аган йомырка сөртергә һәм тагын сохари вагында әвәләргә кирәк.

* Әгәр балыкны 15 минут алдан тозлап куйсагыз, ул кыздырганда таралып төшмәс.

* Балыктан фарш ясаганда аз гына шикәр комы да кушсаң, ул тәмлерәк була.

* Сельдь балыгы тәм­ле­рәк булсын өчен аны бераз чәйдә, яки сөттә тоталар.

* Әгәр балыкны кыздырыр алдыннан бераз сөттә тотып, онда әвә­ләсәң һәм кайнап торган үсемлек маенда кыздыр­саң, ул бигрәк тә тәмле була. Кайнар май чәч­рәмәсен, ә балык яхшырак кызсын, дисәгез, табаның өстен тишекле чүмеч белән каплап куегыз.

* Балык нык тозлы булса, аны агып торган салкын су астында яисә савыттагы суны алыштырып тотарга була. Тозлы балыкны җылы суга салырга ярамый.