+7 °С
Болытлы
Барлык яңалыклар
10
Мең дә бер киңәш
9 март 2023, 10:40
Бакчагызның яме булачак!
Бу гаҗәеп чәчәкне бер утыртсагыз, ел саен үстерәсегез килер.
Бакчагызның яме булачак!
Бу искиткеч матур чәчәкне бакчасында бер үстереп караган кешеләр аннан аерыла алмыйдыр, мөгаен. Үзем дә канәфер чәчәгенең бу төрен бик яратып үстерәм. Төрек канәференең (турецкая гвоздика) “Джолт Пинк F1” дип аталган сорты бик үзенчәлекле һәм башкаларыннан аерылып тора. Ул инде халыкара конкурсларда күп кенә жюри әгъзаларын әсир иткән, хәзер дөньяның барлык илләрендәге бакчачылар аңа гашыйк, дисәк һич артык булмас.
Чагу матур чәчәкле яңа канәфер гибриды җәй дәвамында шау чәчәктә утыра һәм аны үстерүе дә артык мәшәкать тудырмый.
Ул бик озак вакыт чәчәктә утыруы белән бакчачыларны сокландыра. Канәфер чәчәгенең башка төрләренә караганда, бу сорты нәкъ 4 атнага озаграк, хәтта кар төшкәнче шау чәчәктә утыра! Чәчәкләре чагу алсу төстә, алар кызгылт, шәмәхә һәм сары чәчәк түтәлләрендә аеруча матур күренә.
Шунысы мөһим, бу сорт начар һава торышына бик чыдам.
“Джолт Пинк F1” сортының биеклеге 30 сантиметрга җитә. Аларны бакчадагы алгы планга утырту отышлы. Яфраклары сусыл, куе яшел төстә. Чәчәкләре дә, яфраклары да төсләре белән бер-берсен тулыландырып торуы бик сирәк күренеш. Шуңа күрә канәфер чәчәгенең бу сортын кечкенә кашполарга яки контейнерларга утыртырга да мөмкин, анда ул ялгызы гына да матур күренәчәк!
Бу чәчәкне үстерүе артык мәшәкатьле дә түгел. Әгәр мартта орлыкларын утыртсаң, ул июньдә чәчәк атачак.
Орлыклары бер сантиметр тирәнлектә күмелә һәм пленка белән каплана. Көненә бер-ике тапкыр пленканы ачып, җилләтергә кирәк булачак. Үсентеләре якынча ике атна эчендә күренә башлый, алар 5-6 чын яфрак чыгаргач кына күчереп утыртырга ярый. Төрек канәферен тәрбияләү башка үсемлекләрдән әллә ни аерылмый. Бу — туфракны йомшарту, атнага 1-2 тапкыр су сибү, ашлама кертү. Әлеге чәчәкне җиңелчә күләгә төшкән урында үстерү яхшырак. “Джолт Пинк F1” сорты бакчагызны җәй буенча чәчәк дулкынына күмеп утырачак. Аның матурлыгын күрәсегез килсә, бүгеннән эшкә тотыныгыз.
Автор фотосы.
Читайте нас: