Мунчаланы тетелгәнче кулланасызмы?

Врач-косметолог Василина Миронова гади мунчалада яшеренгән куркыныч турында кисәткән. Бу хакта ул “Абзац” басмасына сөйләгән.

Эксперт сүзләренә караганда, мунча кирәк-яраклары – бактерияләр, гөмбәләр һәм күгәрекләр өчен идеаль урын. Җылы һәм дымлы мохит – микроблар өчен чын оҗмах. Үлгән тире күзәнәкләре, шулай сабын яки гель калдыклары – болар барысы да бактерияләр өчен туклыклы нигез.

Мунчаланы киптереп бетермәү дә куркынычны арттыра. Аларның кайберләре тышкы яктан коры булып күренергә, ләкин эчтән дымлы булып калырга мөмкин.

"Шуңа күрә сез инде микроблар белән тулы мунчаланы кулланганда, бу микроорганизмнарны үз тирегезгә сылыйсыз. Бу тиредә ялкынсыну, кызару, кычыту, акне, бетчәләр чыгу кебек процессларга китерергә мөмкин. Шулай ук гөмбә һәм башка төрле инфекцияләрнең таралу куркынычы да бар. Тиредә җәрәхәтләр булса, бактерияләр чыннан да тирәнрәк үтеп керергә һәм җитдирәк ялкынсыну китереп чыгарырга мөмкин”, — дип аңлаткан Миронова.

Табиб мунчаланы дөрес сакларга киңәш итә. Беренче чиратта аларны яхшылап чайкарга һәм яхшы җилләтелә торган урында тулысынча киптерергә кирәк. Шул ук вакытта һава циркуляциясе бөтенләй булмаган ябык урыннардан, шкафчыклардан һәм ачык контейнерлардан качарга кирәк.

Табиб билгеләвенчә, мунчаланы еш алыштырырга кирәк. Аның сүзләренчә, куллану вакыты материалга бәйле. Синтетик эшләнмәләрне бер-ике ай дәвамында файдаланырга, ә табигый, люфа яки целлюлозадан ясалганнарын өч-дүрт атна саен алыштырырга кирәк. Иң озак кулланырга яраганы — силикон мунчалалар, аларны бер ел кулланырга мөмкин.

Фото: ЯИ