Барлык яңалыклар
Сәясәт
2 декабрь 2014, 21:52

Җиңү көненә мәсьәлә хәл ителсен!

Башкортстан Республикасы буенча Баш федераль инспектор Андрей Чечеватов һәр мөрәҗәгать уңаеннан анык бурычлар билгеләде.Әйткәндәй, Андрей Викторович бу вазыйфага күптән түгел генә тәгаенләнде. Башкортстан Президенты Рөстәм Хәмитов Хөкүмәт йортында шушы уңайдан үткән чарада: “Төбәк властенең, территориаль структураларның һәм башкарма власть органнарының тыгызрак хезмәттәшлек итүен телим”, — дигән иде. Баш федераль инспектор төбәк үсешенә хезмәт итәргә вәгъдә бирде. Андрей Викторовичның сүзендә торуы, халык өчен эшләячәге Русия Федерациясе Президентының Башкортстандагы кабул итү бүлмәсендә беренче тапкыр гражданнарны кабул итүендә үк ачык күренде.

— Нефтьчеләр, авылның санитария-саклау зонасына кереп, казу эшләре алып барды, — диде Краснокама районы Яңа Чөгәнәк авылыннан килгән Вәгыйзь Гәрәев. — Нәтиҗәдә, эчәр сусыз калдык. Лабора­ториядә тикшерү шәхси коелардагы суда организм өчен зарарлы матдәләр булуын ачык күрсәтте. Сер түгел, язгы ташкын чорында су сыйфатының тагын да начараюы ихтимал. Бүген авылда 45 кеше яши. Җәйге чорда халык саны ике тапкыр диярлек арта. Без барыбыз да сезнең ярдәмгә өмет итәбез.
— Су мәсьәләсен ничек хәл итәргә планлаштырасыз? Халык кайчан эчәр су белән тәэмин ителәчәк? — дип сорады Андрей Викторович Краснокама районы хакимияте башлыгы урынбасары Олег Гыйльфановтан.
— Районда су сыйфатының начарлануы — нефтьчеләрнең эшчәнлек нәтиҗәсе. Яңа Чөгәнәктә шәхси коелардагы су санитария таләпләренә җавап бирмәсә дә, уртак кое бар. Андагы суда да зарарлы матдәләр табылса, чистарту корылмалары урнаштырачакбыз...
— Халыкны технологияләр дә, максатка ирешү юллары да кызыксындырмый. Алар бүгеннән тәгаен нәтиҗә, чиста су көтә. 45 кеше гомум коега йөрсен, дияргә телисезме? Кайчан Яңа Чөгәнәк авылы эчәр су белән тәэмин ителәчәк? Төгәл көнен әйтегез.
— 30 декабрьгә кадәр.
Җаваптан бер як та ка­нәгать калмады.
— Вәгъдә тормышка ашар­дай түгел, — диде Вәгыйзь Нисхәт улы. — Халыкны эчәр су белән тәэмин итүдә генә эш бетми. Суны пычратучы за­рарлы матдәләр чыганагы турында да онытырга ярамый. Бүген яңа кое казылып, халык эчәр сулы булыр. Нефтьчеләр эшен туктатмаса, иртәме-соңмы, янә шушы ук хәл кабатланачак. Күңелсез хәлләргә чик кую өчен авыл санитария зонасының генераль планын эшләргә кирәк.
Олег Дәбир улы гене­раль планның май аенда гына эшләнеп бетәчәген сызык өстенә алды.
— Килештек. Май аенда Башкортстан төбәкләренә чыгуны планлаштырам. Димәк, 9 майда Краснокама районы Яңа Чөгәнәк авылына барачакбыз. Эчәр суны бергәләп авыз итәчәкбез. Бу чарадан район хакимияте башлыгы, аның урынбасарлары да читтә калмаячак. Шуңа күрә, башлаган эшегезне намус белән төгәлләгез, — диде Андрей Чечеватов.
Уфада Гоголь урамында яшәүче хаклы ялдагы Альбина Королеваның мөрәҗәгате дә игътибарга лаек. Беренче катта урнашкан кибеттәге унөч суыткыч икенче катта яшәүче­ләргә тынгы бирми. Андрей Викторович кулыннан килгәнчә ярдәм итәргә вәгъдә бирде. Башка мөрәҗәгатьләр дә җитди игътибарга алынды.