Барлык яңалыклар
Сәясәт
16 декабрь 2014, 21:55

Башлыйбыз да ташлыйбыз...

Аерым программаларның ярты юлда тукталып калуы малтабарлык үсешенә аяк чала.“Без бөтен республиканы, шул исәптән Русияне дә, ит, сөт, балык, яшелчә-җимеш белән тулысынча тәэмин итә алабыз. Иң мөһиме — федераль структуралар урындагы авыл хуҗалыгы җитештерүчеләренә йөз белән борылсын, алар белән аңлаешлы һәм үзара ышанычка корылган мөнәсәбәтләр урнаштырсын”. Көнбатыш санкцияләреннән һәм аларга карата Русия тарафыннан кабул ителгән җавап чараларыннан соң республика аграрийларыннан шушы сүзләрне еш ишетергә туры килә. Русия Президентының агымдагы елның 6 августында безгә карата санкцияләр кулланучы илләрдән азык-төлек товарлары кертүгә чикләүләр турындагы карарыннан соң уңай үзгәрешләр сизеләме? Урындагы авыл хуҗалыгы продукциясе җитештерүчеләр дәүләттән аерым игътибар тоямы, ярдәм аламы? Шушы сораулар белән без Бакалы районы Мәгълүмат-консультация үзәге директоры Юрий Романовка мөрәҗәгать иттек.

— Соңгы вакытта кулланучылар җәмгыятьләрен тергезү турында сүз йөри. Минем карашка, бүгенге шартларда сулар һава кебек кирәк нәрсә бу. Әгәр дә якын арада кулланучылар җәмгыятьләре тулы куәтенә эшли башласа, без, импорттан тулысынча ваз кичеп, илне, республиканы үзебездә җитештерелгән авыл хуҗалыгы продукциясе белән тулысынча тәэмин итә алачакбыз, — диде Юрий Иванович. — Совет чорында гөрләп эшләгән кулланучылар җәмгыятьләрен тергезү ни өчен кирәк соң? Бер генә мисал китерәм. Күршем озак еллар инде үз бакчасында яшелчә-җимеш үстерә. Бакчасында утызлап алмагач үсә. Быел соң өлгерә торган “Антоновка” сортлысы алманы аеруча күп бирде. Агачың җимешне күп бирсә дә бик кыен икән. Күршем көз буе берничә центнер алманы кая куярга, кемгә сатарга белми җәфаланды. Җыючы булса, арзан гына хакка булса да биреп җибәрер идем, дип уфтанды. Нәтиҗәдә, хуш ис бөркеп торган тәмле алмаларын ихатасындагы малына ашатырга мәҗбүр булды. Хәер, бу хәл гәзит укучыларга таныштыр инде. Чөнки күпләр, күршем кебек, үзеннән артканын кая куярга, кемгә бирергә белми җәфалана. Шуңа да бүген шәхси ихаталарда җитеш­терелгән, экологик яктан чиста авыл хуҗалыгы продукциясен җыюны оештыру кирәк. Шушы эш белән шөгыльләнүче ул товарларны, өстәмә хак куеп, кибетләргә чыгарамы, арытаба эшкәртүгә җибәрәме, республикадан, илдән читтә реализациялиме — анысы аның эше. Иң мөһиме — халыкка, үзеннән артканын кая да булса тапшырып, акча эшләргә мөмкинлек тудырылсын. Югыйсә, кибеткә керсәң (бигрәк тә зур супермаркетларда), исең китәрлек бит: бәрәңге — Польшадан, помидор — Төркиядән, кишер белән редиска Израильдән китерелгән! Шул да булдымы эш? Кибет киштәләре чит ил яшелчәләре белән тулгач, үзебезнекенә анда каян урын булсын?
Бүген авылда яшәүче һәр кешенең кимендә 20 сутый җире бар. Үз бакчаңда җаның теләгән яшелчә-җимешне үс­тереп, үзеңнән артканны куллану­чылар җәмгыятенә тапшырып, акча эшләп була, дигән сүз бу. Авылда яшәү­че­ләрнең күпләре үз җирен буш яткыр­мый яткыруын, ни дә булса үсте­рергә тырыша. Шулай булуга кара­мастан, соңгы елларда шәхси бак­чаларның күпчелек өлешендә үлән үсә. Чөнки яшел­чә-җимешне күпләп үстергән очракта аны реализацияләп булмаячагын авыл кешесе алдан ук белеп тора. Минемчә, бу очракта хәлдән чыгып бу­ла: сезон башланыр алдыннан шәхси крестьян-фермер хуҗалыклары җитәк­челәре нәрсәне һәм күпме җитеш­терәчәге, аны кайда тапшы­рачагы, уңыштан күпме табыш алыначагы ха­кында сөйләшергә, уртак фикергә ки­лергә, бу сөйләшүдә кулланучылар җәм­гыяте җитәкчесе дә катнашырга тиеш.
Читайте нас в