Барлык яңалыклар
Сәясәт
21 февраль 2015, 22:54

Уфа — үзе үк Русия бренды!

ШОС һәм БРИКС саммитларыннан соң әлеге атама Башкортстан башкаласына бик озын-озын елларга тагылырга мөмкин.Быел җәй Уфада узачак дөньякүләм чараларга — ШОС һәм БРИКС саммитларына дүрт айдан артыграк кына вакыт кала. Мәгълүм булуынча, саммитларга 14 меңгә якын кешенең килүе көтелә. Алар — дәүләтләр башлыклары, халыкара оешмалар вәкилләре, рәсми делегацияләр әгъзалары, журналистлар, хокук саклау органнары хезмәткәрләре, хезмәтләндерүче һәм техник персонал. Аңлашыла, саммитларның эчтәлеген югары дәрәҗәдә оештыру гына түгел, шәһәрне читтән килгән һәркем канәгать калырлык, сокланып кайтып китәрлек итеп әзерләү дә көн таләбе булып тора. Чөнки ахыр чиктә дөнья җәмәгатьчелеге Русия хакында Уфада алган тәэссоратларыннан чыгып фикер йөртәчәк.

Бу җәһәттән, ШОС һәм БРИКС саммитларына әзерлек эшләре әле узган елларда ук башланды. Уфа шәһәре хакимия­теннән хәбәр итү­ләренчә, төзек­ләндерү эшләре 5 меңнән артык объектны үз эченә алган. Болар — юл чел­тәрен төзекләндерүгә дә, биналарның тышкы йөзен матурлауга да, транспорт һәм инженерлык инфраструктурасын тәр­типкә китерүгә дә кагыла.
Иң зур эшләр, аңла­шыла, “Уфа” халыкара аэропортында, төп чаралар үтәчәк биналарда һәм кунакханәләр челтәрен үстерү юнәлешендә җәел­де­релгән. Әйтик, әлегә кадәр “Уфа” аэропортының халыкара терминалы сәгатенә 200 пассажирны кабул итә алса, рекон­струкция эшләре тәмамлан­ганнан соң аның куәтләре дүрт тапкыр артачак. Ягъни халыкара терминал сәга­тенә 800 кешене үткәрә алачак.
Әйткәндәй, “Уфа — Аэропорт” юлын да югары кунаклар җилеп кенә үтә­чәк. Чөнки әлеге участокта алып барылучы колачлы эшләрдән соң төп чаралар вакытына ул көзгедәй тип-тигез һәм һәр яклап уңайлы булыр дип көтелә.