+26 °С
Болытлы
Гәзиткә язылуVKOKTelegram
Барлык яңалыклар
Сәясәт
21 март 2015, 22:15

Без – стратегик партнерлар!

Якын чорда Башкортстан белән Чиләбе өлкәсе арасында еллык товар әйләнеше күләмен 40 миллиард сумга җиткерү бурычы куела.19 мартта Уфага губернатор Борис Дубровский җитәкчелегендә Чиләбе өлкәсенең рәсми һәм эшлекле даирәләре делегациясе килде. Аның составына өлкә Хөкүмәте әгъзалары һәм республика белән хезмәттәшлек итәргә теләүче 25 предприятие җитәкчесе кергән.

Делегацияне республика Башлыгы Рөстәм Хәмитов каршы алды. Бу көнне кичен “Башкортостан” дәүләт концерт залында республика һәм өлкә иҗат коллективларының берлектәге концерты узды.
Кичә ике төбәкнең икъти­сади һәм инвестиция мөм­кинлекләре белән таныштыру чарасы узды, Башкортстан Республикасы белән Чиләбе өлкәсе арасында Сәүдә-икъ­тисади, фәнни-техник, социаль һәм мәдәни хезмәттәшлек турында килешүгә кул куелды.
Тәүдә һәр төбәкнең икътисади потенциалы һәм мөмкинлекләре турында бәян ителде.
— Башкортстан — Чиләбе өлкәсенең төп стратегик партнерларының берсе. Бүген ике төбәк арасында товар әйләнеше 30 миллиард сум тәшкил итә. Моннан алты ел элек ул 40 миллиард сум булган. Безнең максат — ике-өч ел эчендә шушы дәрәҗәгә җитү, — диде Борис Дубров­ский һәм бүген Башкортстан белән хезмәттәшлек итүче әйдәүче предприятиеләрне атап үтте. Алар арасында “Урал” автомобиль заводы, Чиләбе трактор заводы, Усть-Катав вагоннар төзү пред­приятиесе һәм башкалар бар.
Борис Александрович мәга­риф, медицина, агросәнәгать комплексы, туризм һәм башка өлкә уңышларына һәм яңа­лыкларына да кагылды. Тө­бәктә елына 2 миллион тоннадан артык бөртекле культура җыеп алына. Ул макарон эш­ләнмәләре җитештерү бу­енча Русиядә — беренче, ә кош ите җитештерү буенча икенче урынны били. Агро­сәнәгать комплексында 700дән артык предприятие исәпләнә.
Рөстәм Хәмитов Башкорт­стан­ның икътисади күрсәткеч­ләренә тукталды, яңалыклар белән таныштырды.
— Чиләбе өлкәсе һәм Башкортстан арасында һәрвакыт якын, җылы, эшлекле мөнәсә­бәтләр булды. Ике төбәк икътисадта бер-берсен тулыландыра, без бер-беребезгә ки­рәкле продукция җитеш­терәбез. Чиләбедә металл булса, бездә — ягулык, анда — ит, бездә — сөт, анда маши­налар төзелә, бездә агач эшкәртелә. Безнең өчен төп бурыч — ике арадагы эшчән­лекне көйләү, моңа кадәр ул үз җаена барган. Җитәкчелек моны контрольгә алырга тиеш, — диде Рөстәм Хәмитов.
Очрашуда шулай ук “Южноуральск” транспорт-логистика комплексы генеральный директоры Владимир Павлов чыгыш ясады. 2012 елда төзелә башлаган комплексны Чиләбе өлкәсенең транспорт һәм логистика өлкәсендәге иң зур һәм җитди проекты дип атыйлар. Аны гамәлгә ашыру өчен Кытайның Русиягә иң якын булган төбәге — Синьцзян-Уйгур автономияле районы хөкүмәте белән килешү тө­зелгән. Әлегә кадәр Кытайдан йөк диңгез аша (50 көн эчендә), тимер юлы белән (бер айда) ките­релсә, әлеге комплекс сафка керү белән юл берничә тапкыр кыскарачак. Өремчедән товарлар бөтен Кытайны урап чыкмыйча, шунда ук Русиягә җибәреләчәк һәм ун көн эчендә тиешле урында булачак.
* * *
Чиләбе өлкәсе губернаторы Борис Дубровский һәм республика Башлыгы Рөстәм Хәмитов XXV Халыкара ”Агрокомплекс” күргәзмәсендә авыл хуҗалыгы техникасын, аграр җитештерү һәм эшкәртү сәнәгате өчен заманча җиһазларны, үсем­лекчелек һәм терлекчелек ихтыяҗлары өчен продукцияне карадылар.
Борис Дубровский төбәк­ләрдә җитештерелгән продукцияне товар җитештерү чел­тәре ярдәмендә бергәләп базарга чыгару идеясен тәкъдим итте. Умартачылык һәм апитерапия буенча республика фәнни-тикшеренү үзәге стенды янында Чиләбе кунаклары башкорт балыннан авыз итте, Үзәк вәкилләре төрле катнашмалар кушылган бал турында сө­й­ләде.
Читайте нас: