Сәламәт мохиттә яшьләр абынмый!

Уфада өч көнлек семинарда “Бердәм Русия”нең урындагы бүлекләренең башкарма комитетлары җитәкчеләре белән очрашуда Дәүләт җыелышы-Корылтай Рәисе Константин Толкачев, Төбәк башкарма комитеты җитәкчесе Рәмзил Ишсарин һәм депутатлар катнашты.
Сергей Железняк урындагы башкарма комитетлар җитәкчеләренең әзерлек дәрәҗәсен югары бәяләде, әлеге семинарларның мөһимлегенә һәм әһәмиятенә басым ясады.
— Сайлауларга без сайлау алды кампанияләре вакытында гына әзерләнергә тиеш түгелбез. Башкортстанда “Бердәм Русия” төбәк бүлек­чәсенең ышанычлы һәм тотрыклы эшләве миңа яхшы билгеле, — диде Сергей Железняк.
Арытаба Дәүләт думасы вице-спикеры фракцияара депутатлар төрке­менең наркомания һәм йогыш­лы чирләрне профилактикалау һәм авыруларны реабилитацияләү буенча 16нчы утырышында катнашты. Әңгә­мәнең темасы — Русиядә наркомания һәм эчкечелекне комплекслы профилактикалауны формалаштыру.
Тәүдә депутатлар бу авыруларны профилактикалауда әле гамәлдә булган законнарга тукталып китте. Депутатлар ил төбәкләрендә башкарылган эшкә бәя бирде.
Героин кулланучыларның саны елдан-ел кимесә дә, спайска карата битараф булмаганнарның саны арта. Афәт Башкортстанны да читләп узмады. Әлегә медицина хезмәткәрләре мондый авыруларны дәвалау буенча бернәрсә дә тәкъдим итә алмый. Утырышта депутатлар билгеләвенчә, наркоманны дәвалау — власть эше генә түгел, бу эшкә иҗтимагый оешмалар, мәчет һәм чиркәүләр дә кушылырга тиеш.
— Юлдан язганнарның үз-үзендә көч табып, авыру белән үзе көрәшеп, җәмгыятькә кайтуы мөһим. Шуңа күрә бүгенге әңгәмәдә яңгыраган тәкъдим­нәрне тормышка ашырырга тырышачакбыз, — диде Дәүләт думасы вице-спикеры.
Дәүләт җыелышы-Корылтай Рәисе Константин Толкачев билгеләвенчә, халык арасында наркомания һәм алкоголизмның таралуы социаль афәткә әверелде һәм Русиянең милли хәвефсезлеге өчен куркыныч яный.
— Кызганычка каршы, республика парламентарийларының закон бозган алкоголь сатучыларга катырак җәза бирергә дигән тәкъдимен Мәскәү хупламады. Әмма Дәүләт җыелышы-Корылтай депутат­ларының бу өлкәдә уңышы юк түгел. Мәсәлән, авыл халкының спиртлы эчемлекләрне кайда сатарга мөм­кинлеген үзләре хәл итә алуы хакында республика законы бар, — диде Константин Толкачев.