+26 °С
Болытлы
Гәзиткә язылуVKOKTelegram
Барлык яңалыклар
Сәясәт
10 октябрь 2015, 22:56

Узган еллар нәтиҗәле булды

Республика көне алдыннан Дәүләт җыелышы-Корылтайда Ачык ишекләр көне үтте. Анда иҗтимагый берләшмәләр, милли-мәдәни үзәкләр вәкилләре, республиканың Иҗтимагый палата әгъзалары чакырылган иде.

Аларны Дәүләт җыелышы-Корылтай Рәисе Константин Толкачев сәламләде һәм Баш­кортстанның чирек гасыр эчендә үткән юлы, парламент эшчәнлеге, алда торган бурычлар турында сөйләде.
— 25 ел эчендә Башкортстан җитди үзгәрешләр юлы үтте, шуларның берсе — профессиональ парламент төзү. Ул җәмгыятьтә барган бөтен үзгәрешләрне законнар белән тәэмин итү җаваплылыгын үз өстенә алды, —диде ул.
Парламент спикеры төбәк автономиясе тарихы турында җентекле бәян итте. Русиянең федератив төзелеше структурасында Башкортстан — тәүге юл салучы. Дәүләт оешмасы буларак, нәкъ безнең республиканы үзәк власть беренче булып таныды. Арытаба Русиядә күпсанлы автономияле республикалар барлыкка килде, — дип билгеләде Константин Толкачев.
Дәүләт җыелышы-Корылтай Рәисе 25 ел элек дәүләт оешмасы статусын үзгәртү зарур­лы­гының сәяси сәбәпләре исә­бендә идеологик, әхлакый, мәдәни проблемаларны атады. Алар республика дәүләтчеле­генең яңа дәрәҗәгә күчүенә булышлык иткән.
Константин Толкачев Башкортстан хал­кы­ның тормыш сыйфатын яхшырту өчен депу­татларның нинди эш башкаруы турында сөй­ләде. Узган гасырның 90нчы елларында парламент берьюлы ике мөһим бурычны үти: законнар чыгару механизмын яңа дәрәҗәгә күтәрергә һәм законнар базасын тиз арада үстерергә кирәк була.
2000 еллар башында Башкортстан икътисадны, җәмгыятьне, хокукый системаны үстерү ихтыяҗын дөрес чагылдыручы үсешкән законнар чыгару базасына ия төбәк булуга ирешә.
Бу көнне парламент Рәисе сорауларга җавап бирде, аннары актив җәмәгать эшчәнлеге алып баручыларга Дәүләт җыелышы-Корылтай бүләкләрен тапшырды.
Ачык ишекләр көнендә катнашучыларга Дәүләт җыелышы турында фильм, Парламент музее, Дәүләт символикасы залы, зур утырышлар залы күрсәтелде.
Читайте нас: