Бюджет документына үзгәреш хупланды

Закон проекты берьюлы өч укуда карау өчен тәкъдим ителәчәк. Парламент Рәисе Константин Толкачев белдерүенчә, үзгәрешләр кертүнең сәбәпләре берничә.

– Проект аңлатмасында алар 11 пунктта күрсәтелгән. Бюджетның салымнан тыш керемнәренең иң зур өлеше (2 миллиард сум) — “Башнефть” компаниясе акцияләреннән кергән дивидендлар. Узган елның ноябрендә “Бюджет турында” закон кабул иткәндә дивидендлар 3 миллиард сум күләмендә каралган иде. Компаниянең Директорлар советы тарафыннан расланган һәм быелгы бизнес-планда каралган өстәмә керемнәргә бәйле, бу күрсәткеч 5 миллиард сумга җитте. Бу акчалар социаль объектлар төзүгә, республиканың максатлы инвестиция программасын гамәлгә ашыруга, ягъни төбәктә социаль һәм икътисади тотрыклы­лыкны тәэмин итүгә юнәлтеләчәк. Шулай ук, федераль бюджеттан агро­сәнәгать комплексына ярдәмгә һәм Моношәһәрләрне үстерү фондыннан Күмертау шәһәренең инфраструктура объектларын төзү һәм реконструк­цияләүгә чыгымнарны өстәмә финанслауга тәгаенләнгән керем күләме 463 миллион сумга җитте. “Бюджет турында” законга ел дәвамында төзәтмәләр кертү гамәлдә күптән кулланыла, – дип белдерде Константин Толкачев.