+12 °С
Ачык
Гәзиткә язылуVKOKTelegram
Барлык яңалыклар
Сәясәт
19 март 2016, 02:00

“Һәркем өчен ачыкбыз!”

Дәүләт җыелышы-корылтай депутаты, Бөтендөнья башкортлары корылтае Башкарма комитеты рәисе Әмир Ишемгулов белән әңгәмә.Катлаулы икътисади, сәяси чорда абруйлы иҗтимагый оешма­ларның әһәмияте тагын да арта. Бөтендөнья башкортлары корылтае – нәкъ шундый оешма. Корылтай Башкарма комитеты киләчәккә нинди планнар белән яши? Оешма төбәк икътисадын үстерүгә ни дәрәҗәдә булышлык итә? Бөтендөнья башкортлары корылтае Башкарма комитеты рәисе Әмир Ишемгулов белән шул хакта әңгәмәләштек.

[b]– Әмир Миңнеәхмәтович, Корылтай власть, иҗ­тимагый оешмалар белән нинди хез­мәттәшлек алып бара?[/b]

– Республика җитәкчелеге ярдәмен тоеп, власть белән килешеп, аңлашып эшлибез. Бөтендөнья башкортлары корылтае халык хөрмәт иткән, төбәк җитәкчелеге өчен мөһим булган оешмага әверелергә тиеш. Мак­сатларыбыз җитди. Беренче чиратта, алда идеологик тәрбия бирү, төбәктәге социаль-икътисади хәлне яхшырту, башкорт халкының телен, мәдәниятен саклау һәм үстерү бурычы тора. Милләтләр арасындагы дустанә мөнәсәбәтләрне саклау мөһим. Әлбәттә, бу максатларга үз көчебез белән генә ирешә алмаячакбыз. Республиканың Мәгариф, Мәдәният, Яшьләр сәясәте һәм спорт министрлыклары, Матбугат һәм киңкүләм мәгълүмат чаралары буенча агентлык һәм башка ведомстволар, оешмалар белән хезмәттәшлек турында килешү төзергә ниятлибез. Көчләрне бер­ләштерсәк, алда торган максатларга тизрәк һәм нәтиҗәлерәк ирешәчәкбез.

[b]– Сез күптән түгел генә Бөтендөнья башкортлары корылтае Башкарма комитеты рәисе итеп сайландыгыз. Нинди планнар белән яшисез?[/b]

– Җитди һәм җаваплы вазыйфаның нечкәлекләренә төшенеп кенә киләм. Башкарма комитетның яңа составтагы утырышын үткәрергә әзерләнә­без. Анда яңа структура, башкорт иҗтимагый оешмалары белән эшләү буенча координация советы эшли башлаячак. Башкортстан тарихы, мәдәнияте өчен мөһим чаралар оештыру күздә тотыла. Күптән түгел дәүләт эшлеклесе Муса Мортазинның тууына 125 ел тулу уңаеннан “түгәрәк өстәл” үтте. Әхмәт-Зәки Вәли­дигә Уфада урнаштырылган мемориал тактага чәчәкләр салдык. Шушы чаралар Башкортстан оештырылуның 100 еллыгына әзерлек эшләренә старт бирде. “Йөз еллыкка – йөз шәхес” программасы кысаларында эш дәвам итәчәк, Ырынбурда “Кәрвансарай” башкорт халык йортына нигез салынуга 170 ел тулу уңаеннан конференция һәм башка чаралар да оешкан төстә үтәчәк.

[b]– Башкарма комитеттагы яңа структура нинди мәсьә­ләләрне хәл итә­чәк?[/b]

– Югарыда әйтеп үтүемчә, җитди мәсьәләләрне хәл итү өчен фикердәшләрне, көчләр­не берләштерергә кирәк. Координация советының төп максат­ларының берсе дә шуңа кайтып кала. Мәгълүм булуынча, заман яшьләре Интернет челтәре, телевидение йогынтысында тәрбияләнә. Нәтиҗә­дә, алар тормышта дөрес юл сайламаска мөмкин. Без республика яшьләрен берләш­тереп, аларның көч-энергиясен халыкка игелек китерердәй эш-гамәлләргә юнәлтергә планлаштырабыз. Өлкән яшьтә­геләр дә игътибардан читтә калмаячак. Алар өчен Аксакаллар советы оештырылачак. Советка күренекле эшлек­леләр керәчәк. Һәр районда киңәш органы булачак. Нәти­җәдә, өлкән буын яшьләргә киңәшләр бирәчәк, тормыш тәҗрибәсе белән уртаклашачак. Шулай ук, Корылтай карарларын кабул иткәндә дә Аксакаллар советы фикерләре игътибарга алыначак. Бөтен­дөнья башкортлары корылтае планнары, игелекле гамәлләре белән халыкны даими таныштырып бару күздә тотыла. Бу максатка республика гәзитлә­рендә “Корылтай” кушымтасы оештырып ирешмәкчебез.

[b]– Аңлашылуынча, яшьләр бе­лән яңача эшләргә, аларны борчыган мәсьәлә­ләргә җитди игътибар бүлергә исәп тотасыз. Ә балаларга бәйле эштә нинди яңа­лыклар көтелә?[/b]

– Яңа вазыйфага сайлангач та яшьләр оешмалары вә­килләре белән очраштык. Алар үзәкләренә үткән мәсьәләләр белән уртаклашты, теләкләрен җиткерде. Фикер алышу яшь­ләр даирәсендә идеолог һәм идеология юклыгын ачык күрсәтте. Яшьләр алдаганны, вәгъдә биргәч, үтәмәүне яратмый. Мондый хатага юл куючылар үсеп килүче буын ышанычын бик озакка югалта. Гомумән, яшьләр игътибарга, дөрес юл күрсәтүгә мохтаҗ. Безгә алмашка киләчәк буын белән ешрак очрашып торачакбыз һәм аларны борчыган мәсьәләләрне хәл итү юлларын эзләячәкбез.

Балалар да игътибардан читтә калмаячак. Төрле фән­нәр буенча федераль дәрес­лекләргә төбәк компоненты кертергә исәп тотабыз. Мәга­риф буенча эшче төркем дәреслекләргә өстәмәләр кертәчәк. Мәсәлән, биология, география дәресләрендә Башкортстандагы җәнлекләр, үсемлекләр дөньясы өйрәне­ләчәк. Шулай итеп, туган якка сөю кечкенәдән тәрбияләнәчәк. Башка планнар да бар. Әйтик, республика Мәдәният министрлыгы белән берлектә Башкортстан халыкларының милли нәкышлары белән бизәлгән заманча киемнәр тегәргә исәп тотабыз. Яшьләрне лаеклы алмаш итеп тәрбияләүдә спортка да таянабыз. Милли спорт төре көрәшне саклау, үстерү өчен зур көч салачакбыз.

[b]– Бөтендөнья башкортлары корылтае рес­публиканың социаль-икътисади үсешенә ни дәрәҗәдә булышлык итә?/b]

– Иҗтимагый оешманың эш­чәнлеге мәдәни, рухи юнә­лешләр белән генә чик­лән­мәскә тиеш. Мул тормышта яшәүче халык кына телен, гореф-гадәтләрен, мәдәниятен саклап кала ала. Русия төбәк­ләренең, чит илләрнең башкорт корылтайлары белән берлектә “Башкортстан продукты” брендын дөньяга танытырга кирәк. Төбәккә туристлардан тыш, инвесторларны да җәлеп итү мөһим. “Ел кешесе” бәйгесе оештырып, төрле һөнәр ияләре вәкил­ләрен бүләкләү күздә тотыла. “Аек авыл” республика конкурсын яңа дәрәҗәдә оештырачакбыз. Дини сәясәт буенча комиссия төзеләчәк. Белгеч­ләребез барлык конфессияләр белән очрашачак. Гомумән, безнең ишекләр барлык милләт һәм конфес­сияләр вәкилләре өчен һәрвакыт ачык. Һәркемне тыңларга, кулдан килгәнчә ярдәм итәргә әзербез. Башкортстанда һәр милләт вәкиле имин тормышта, бәхетле яшәгәндә генә төбәк икътисады үсешәчәк. Республикада һәркем җиң сызганып эшләсә, бу максатка тизрәк ирешелер.

– Әмир Миңнеәхмәт улы, эчтәлекле әңгәмә өчен зур рәхмәт! Алдыгызга куйган максатларыгызга ирешеп, Башкортстан үсешенә, имин­легенә киләчәктә дә тугры хезмәт итүегезне телибез.
Читайте нас: