“Бердәм Русия” партиясе көчәя!

24 октябрьдә Мәскәүдә “Бердәм Русия” партиясе җитәкчелеге фирканең төбәк бүлекчәләре секретаре вазыйфасына кандидат булган, яңа сайланган субъектлар башлыклары белән очрашты. Анда Башкортстан Башлыгы Радий Хәбиров та катнашты.

Утырышны ачып, партия Рәисе, Русия Хөкүмәте Премьер-министры Дмитрий Медведев янә бер тапкыр сайлауларда гражданнар күрсәткән ышанычны алар файдасына көндәлек эш белән акларга кирәклеге турында искәртте.

— Сәяси көндәшлек елдан-ел көчәя баруга карамастан, безнең партия әйдәүче позицияләрне саклап килә. 8 сентябрьдә үткән Бердәм тавыш бирү көне йомгаклары буенча без барлык мандат­ларның 65 процентын, ягъни өчтән ике өлешен алуга ирештек. Бу — бик яхшы күрсәткеч, дип саныйм. Әйткәндәй, әлеге күрсәткеч үткән сайлаулардагыдан 15 процентка югарырак.

Шул ук вакытта, күр­сәтелгән ышанычны гражданнар мәнфә­гатендә көндәлек фидакарь хезмәт белән акларга кирәк. Әйе, сез көн саен нәкъ шул эш белән шөгыль­ләнәсез. Яңа производстволар, яңа юллар, төзек­ләндерелгән ихаталар — болар барысы да һәр дәрәҗәдә һәм һәр төбәктә халыкның тормышын яхшырту буенча алып барылучы эшнең ачык мисалы. Боларны дәвам итәргә һәм тагын да югарырак сыйфат дәрәҗәсенә чыгарырга кирәк, — диде Дмитрий Медведев.

Ул, шулай ук, аерым губер­наторларның партиянең төбәк бүлекчәләрен җитәкләү башлангычын тулысынча хуплавын белдерде.

— Бу башлангычны җен­текле өйрәнәчәкбез. Шәхсән мин аны бик дөрес, дип саныйм. Дөрес, төбәк бүлекчәсе секретаре вазыйфасын башкару — субъект җитәкчесе өчен өстәмә йөкләмә. Әмма, икенче яктан караганда, әйдәүче партия төбәк җитәк­чесе өчен мөһим ресурс та булып тора. Чөнки, безнең партияне төрле дәрәҗәдәге дистәләрчә мең депутат тәкъдим итүен исәпкә алганда, ул берьюлы ничәмә мең кешене ишетү мөмкинлеге бирә. Аннары, иң ерак, төпкел территорияләрдә дә партиянең урындагы, беренчел бүлек­чәләре бар, һәм алар барысы да субъект Башлыгына, әгәр дә ул фирканең төбәк бүлекчәсе секретаре дә икән, ныклы терәк-таяныч булырга тиеш. Шуңа да биредә утыручылар төбәк бүлекчәләрен үз кулларына алачак икән, әлеге партия структуралары алар өчен ныклы терәккә әверелер, халыкны борчыган чынбарлык мәсьәләләргә ныграк үтеп керү һәм алар буенча дөрес карарлар кабул итү мөм­кинлеге бирер дип уйлыйм, — диде Дмитрий Медведев.

Соңрак “Бердәм Русия”­нең Генераль советы Президиумы 13 төбәк җитәкчесенең кандидатурасын партиянең төбәк бүлекчәләре секретаре вазыйфасын үтәүче сыйфатында килештерү турында карар кабул итте. 13 төбәк җитәкчесе арасында Башкортстан Башлыгы Радий Хәбиров та бар, ул партиянең республика бүлекчәсен җитәкләячәк. Президиумның икенче карары белән исә әлегә кадәр “Бердәм Русия” партиясе төбәк бүлекчәсе башкарма комитеты җитәк­чесе вазыйфасын вакытлыча башкарган Рөстәм Әхмә­динуров шушы вазыйфада расланды.

— Белүегезчә, кайсы гына сайлау кампаниясендә дә төбәк­ләрдәге иң югары җитәк­челәр әйдәүче рольне уйный. Кемдер партия тарафыннан үзе күрсәтелә, кемдер партия исемлеген җитәкли. Без губернаторлар белән төбәкне үстерү программасын да бергә эшлибез һәм бергә аны тормышка ашырабыз да. Бу җәһәттән безнең коллегалар зур тәҗрибәгә ия. Байтак еллар төбәкләрне җитәкләгән коллегаларыбыз да, яңа гына сайланганнары да, киләчәктә сайлауларда катнашачаклары да бар. Ничек кенә булмасын, партия лидеры Дмитрий Медведев ассызыклавынча, көчләребезне берләш­терергә кирәк. Бу — безнең сайлаучыларыбызга карата да, урыннарда эшләүче партиядәш­лә­ребезгә карата да гадел булачак. Аннары, партиянең төбәк бүлек­чәләрен җитәкләүче губернаторлар халык белән аралашу өчен өстәмә канал да алачак. Ул, авыл Советларыннан алып, Дәүләт думасына кадәр зур депутатлар корпусын тәшкил итәчәк. Бу, чыннан да, төбәк үсешендәге мөһим программаларны тормышка ашыруда субъект җитәкче­ләренә зур терәк булачак, — диде бу уңайдан партиянең Генераль советы секретаре Андрей Турчак.

Җомга көнне, 25 ок­тябрьдә, Уфада “Бердәм Русия” партиясе Башкортстан төбәк бүлек­чәсенең конференциясе үтте. Аның көн тәртибенә төп мәсьәлә итеп Башкортстан Башлыгы Радий Хәбиров­ны партиянең төбәк бүлекчәсе секретаре вазыйфасына сайлау мәсьәләсе чыгарылды. Конфе­ренциядә катнашучылар яшерен тавыш бирү юлы белән Радий Хәбировны “Бердәм Русия” партиясе Башкортстан бүлек­чәсенең яңа секретаре итеп сайлады. Үз чиратында, Радий Фәрит улы ун ел дәвамында партиянең Башкортстан бүлекчәсен җитәк­ләгән Дәүләт җыелышы-Корылтай Рәисе Константин Толкачевка фидакарь хезмәт өчен “Бердәм Русия” фиркасе Рәисе Дмитрий Мед­ведевның Рәхмәт хатын тапшырды.

Җәмгысы исә партиянең төбәк бүлекчәләрен 13 субъект җитәк­чесе: Адыгея Республикасыннан — Мурат Кумпилов, Башкортстан Республикасыннан — Радий Хәбиров, Кабарда-Балкар Республикасыннан Казбек Коков, Якутия Республикасыннан — Айсен Николаев, Приморье краеннан — Олег Кожемяко, Ставрополь краеннан Владимир Владимиров, Брянск өлкәсеннән Александр Богомаз, Киров өлкәсеннән — Игорь Васильев, Мурманск өлкәсеннән — Андрей Чибис, Түбән Новгород өлкәсеннән Глеб Никитин, Новосибирск өлкәсеннән — Андрей Травников, Самара өлкәсеннән — Дмитрий Азаров, Севастополь­дән — Михаил Развожаев, шулай ук Алтай Республикасыннан сенатор — Татьяна Гигель, Ингушетия Республикасы Хө­күмәте рәисенең беренче урынбасары Михаил Илезов, Чечня Республикасы парламенты рәисе Магомед Даудов, Хабаровск өлкәсеннән Федерация Советы әгъзасы Максим Иванов, Курск өлкә думасы депутаты Валерий Мелихов, Новгород өлкә думасында “Бердәм Русия” фракциясе җитәкчесе Михаил Галахов, Псков өлкәсеннән Дәүләт думасы депутаты Александр Козловский — барлыгы 20 иң югары даирә вәкиле җитәкләячәк. Һәм абруйлы аналитиклар һәм экспертлар бил­геләвенчә, барлык кандидатуралар буенча да уңай карар кабул ителгән очракта, “Бердәм Русия” партиясе сизелерлек көчәячәк. Димәк, халыкны борчыган көнүзәк социаль мәсьә­ләләрне хәл итүдә мөһим инструментларга әверелгән “Бердәм Русия” партиясенең күпсанлы проектларын, программаларын тормышка ашыру барышы да яңа югарылыкка күтә­реләчәк. Кыскасы, “Бердәм Русия” партиясе эчендә барган яңарыш процессыннан фирка өчен генә түгел, гомум халык тормышында да мөһим нәтиҗәләр, казанышлар көтик!