Радий Хәбиров: "Бу - безнең эшнең нәтиҗәсе"

Тугыз айда Башкортстанда төп капиталга инвестицияләр күләме индексы 115,1 процент тәшкил итте. Бу хакта республика Башлыгы Радий Хәбиров, төбәкнең социаль-икътисади үсешенең төп күрсәткечләрен әйтеп, атна саен үткәрелә торган оператив киңәшмәдә хәбәр итте.

– "Сентябрь" указының бурычы - инвестицияләр күләмен 2024 елга 500 миллиард сумга җиткерү. Шуңа күрә без ел саен әлеге күрсәткечнең 10 процент үсешен тәэмин итәргә тиеш, - дип билгеләп үтте Радий Хәбиров.
Гыйнвар-октябрь айларында Башкортстанда сәнәгать җитештерү индексы 104,4 процент тәшкил итте. Авыл хуҗалыгында уңай динамика саклана: тармакта продукция җитештерү индексы 100,4 процентка җитте.

Торак тапшыру күләме, узган елның шул ук чоры күрсәткеченнән 6,5 процентка артып, 1,7 миллион квадрат метр тәшкил иткән.

– Бездә төзелеш базары үсә, өлешләп катнашу килешүләренең саны арта. Әгәр дә мондый темпларны саклап калсак, «Торак һәм шәһәр мохите» гомумдәүләт проекты бурычларын үтәячәкбез, - диде Радий Хәбиров.

Моннан тыш, Башкортстанда юл-транспорт һәлакәтләрендә (15,4 процентка), алкоголь белән агуланудан (47 процентка) һәм янгыннардан (37 процентка) үлем күрсәткечләре шактый кимеде.

Республика Башлыгы министрлык һәм ведомстволар, төбәк предприятиеләре җитәкчеләренә нәтиҗәле эшләре өчен рәхмәт белдерде.

- Тулаем алганда, без яхшы үсешәбез, яхшы динамиканы билгелибез. Бу - безнең уртак эшебез нәтиҗәсе, - дип ассызыклады Радий Хәбиров.