Башкортстан Бердәм тавыш бирү көненә әзер

Башкортстан Үзәк сайлау комиссиясе рәисе Илона Макаренко киңәшмәдә Бердәм тавыш бирү көнен үткәрүгә әзерлек турында сөйләде.

- Федераль закон һәм Русия Федерациясе Үзәк сайлау комиссиясе карары нигезендә билгеләнгән сайлауларда тавыш бирү быел өч көн: 17, 18 һәм 19 сентябрьдә уздырыла. Тавыш бирү вакыты - 8.00-20.00 сәгатьтә, - диде Илона Макаренко. - Дәүләт власте һәм урындагы үзидарә органнары белән тыгыз хезмәттәшлектә сайлауларны 69 территориаль һәм 3 мең 403 участок комиссиясе уздыра, шуның 39ы сайлаучылар вакытлыча булу урыннарында (дәваханәләрдә, тикшерү изоляторларында, тимер юл вокзалында) төзелде. Барлык сайлау комиссияләре әгъзалары уку узды һәм 8 сентябрьдә эшкә кереште.

Тавыш бирү биналары тиешле хезмәтләр тарафыннан тикшерелде һәм эшкә әзер. Аларның барысы да стационар һәм күчмә тартмалар, тавыш бирү кабиналары, кирәкле җиһаз, сейфлар, шул исәптән сейф-пакетларны саклау, видеокүзәтү яки видеотеркәү чаралары, стационар яки кул металлодетекторлары белән тәэмин ителгән. 230 сайлау участогы сайлау бюллетеньнәрен эшкәртү комплекслары (КОИБ) белән җиһазландырылган.

- Бу безнең ил һәм республика өчен мөһим сәяси чара. Без аны оешкан төстә һәм законнарга туры китереп уздырырга тиеш, - дип ассызыклады республика Башлыгы Радий Хәбиров. - Муниципалитетлар сайлауларны оештыру белән шөгыльләнергә тиеш. Ә безнең уртак бурычыбыз - өч көнлек тавыш бирүнең иминлеген тәэмин итү.

Фото: bashinform.ru