Владимир Путин елга йомгак ясый

Чара Мәскәүдә “Манеж”да ачык форматта уза, анда коронавирус пандемиясе белән бәйле чикләүләр аркасында бары тик 507 журналист кына аккредитация үткән. Русия киңкүләм мәгълүмат чаралары, шул исәптән чит ил журналистлары да, дәүләт башлыгына сораулар бирә алачак.

Владимир Путинның зур матбугат конференциясе - узып баручы елга нәтиҗә ясау ул. Кагыйдә буларак, башта ул илдәге икътисади хәл һәм борчыган проблемаларны хәл итү буенча Хөкүмәт тарафыннан башкарылган эш турында сөйли.

Матбугат конференциясен туры трансляцияләүне “Россия 1”, “Россия 24”, НТВ һәм Беренче канал телевизион каналлары, шулай ук “Маяк”, “Вести ФМ” һәм “Русия радиосы” радиостанцияләре башкара. Сурдотәрҗемә “Россиянең иҗтимагый телевидениесе” (ОТР) телеканалының туры эфирында һәм шулай ук ОТР сайтында (http://www.otr-online.ru/online/) гамәлгә ашырыла.

Владимир Путин журналистлар белән очрашуларны 2001 елдан бирле үткәрә. Иң кыска конференциясе 1 сәгать 33 минут дәвам иткән, иң озыны Владимир Путин Русия Хөкүмәтенә китәр алдыннан 2008 елда булган: ул 4 сәгать 40 минутка сузылган, ил башлыгы 100дән артык журналистның соравына җавап биргән.

2020 елда чараның форматы үзгәртелде: журналистларның бер өлеше Владимир Путин белән бергә аның Мәскәү янындагы “Ново-Огарево” резиденциясендә булды, бер өлеше Президент белән “Халыкара сәүдә үзәге”ннән видеоэлемтә аша аралашты. Очрашу 4 сәгать 29 минут дәвам итте, Владимир Путин 60 сорауга җавап бирде.

Фото: tass.ru