+21 °С
Болытлы
Сәясәт
28 декабрь 2021, 05:10
Фольклориада,Әбҗәлилдә – Путин, җанисәп...
Елның иң мөһим вакыйгаларын барлыйбыз.2021 елда Башкортстанның иҗтимагый-сәяси тормышы вакыйгаларга бай булды. Без аларның иң әһәмиятлеләрен барладык.
Фольклориада,Әбҗәлилдә – Путин, җанисәп...
28 гыйнварда Башкортстан Башлыгы Радий Хәбиров Дәүләт җыелышы-Корылтайга Юллама белән мөрәҗәгать итте. Колонналы залда үткән чарада республика парламенты депутатлары, дәүләт власте һәм урындагы үзидарә органнары, предприятиеләр җитәкчеләре, иҗтимагый һәм дини оешмалар вәкилләре, хезмәттә һәм җәмәгать эшчәнлегендә танылу алган гражданнар катнашты.
19 февральдә Башкортстан Башлыгы Радий Хәбиров Уфага нигез салынуның 450 еллыгына багышланган киңәшмә нәтиҗәләре буенча тиешле указга кул куйды. Документ нигезендә, Башкортстанда Уфа юбилеена әзерлек буенча республика оештыру комитеты булдырылды. Аның составы билгеләнде. Ул федераль оештыру комитеты белән тыгыз элемтәдә эшләячәк.
10 февральдә Мәскәүдә Радий Хәбиров Русия Хөкүмәте Рәисе урынбасары Алексей Оверчук уздырган Уфаның 450 еллыгын бәйрәм итүгә әзерлек буенча киңәшмәдә катнашты.
Русия Президенты Владимир Путин Башкортстан милкенә “Башкортстан сода компаниясе” акцияләренең 38,3 процентын тапшыру турында карар кабул итте. Тагын 11,7 процент+ бер акция республика Хөкүмәтенең тулы контролендә булган структураларга ышанычлы идарәгә тапшырылды. Шулай итеп, Башкортстан предприятиене тулысынча контрольдә тота. Бу хакта дәүләт башлыгы 31 мартта Русия Хөкүмәте әгъзалары белән видеоконференция режимында узган киңәшмәдә хәбәр итте, анда төбәк җитәкчесе Радий Хәбиров катнашты.
17 апрельдә Гафури районында Башкортстан Башлыгы Радий Хәбиров “Медиайыйын” милли киңкүләм мәгълүмат чараларының беренче форумының йомгаклау утырышында катнашты. Ул “Красноусольский” шифаханәсе мәйданчыгында 250дән артык мөхәррир, республика һәм муниципаль киңкүләм мәгълүмат чаралары журналистлары, блогерлар һәм экспертларны җыйды. Утырышта киңкүләм мәгълүмат чаралары эшчәнлегенең актуаль мәсьәләләре, милли телләрдә киңкүләм мәгълүмат чаралары үсешенә дәүләт ярдәме күрсәтүнең төп юнәлешләре турында фикер алыштылар.
12 майда Луганскида Башкортстан Башлыгы Радий Хәбиров Русия Федерациясе делегациясе составында Донецк Халык Республикасы һәм Луганск Халык Республикасы оешуга җиде ел тулуга багышланган тантаналы җыелышта катнашты. Төбәк җитәкчесе халыкны истәлекле дата белән котлады.
Радий Хәбиров Луганск Халык Республикасы Петровское шәһәрендә булды. Нәкъ менә биредә, шушы торак пункт янында 1943 елның февралендә легендар комдив Миңнегали Шәйморатовның сугышчан юлы фаҗигале өзелә. Радий Хәбиров һәм республика делегациясе әгъзалары башкорт атлылары һәйкәленә чәчәкләр салды һәм шул ук скверда агач утыртуда катнашты.
Радий Хәбиров Русия Герое, генерал-майор Миңнегали Шәйморатов һәлак булган урында булды. Легендар комдив дошман тылы буенча рейдтан чыкканда 1943 елның февралендә Штеровка бистәсе тирәсендә һәлак була.
Башкортстан Башлыгы Радий Хәбиров XXIV Петербург халыкара икътисади форумында республиканың рәсми делегациясен җитәкләде, ул 2-5 июньдә узды. Форум нәтиҗәләре буенча Башкортстан 122 миллиард сумлык 25 килешүгә кул куйды. Аларны гамәлгә ашыру төбәктә 2 меңнән артык эш урыны булдырырга мөмкинлек бирәчәк. Чараның пленар утырышында Русия Президенты Владимир Путин Башкортстанның инвестиция мохите торышының милли рейтингында лидерлык позицияләрен билгеләп үтте.
3-10 июльдә Евразия континентының йөрәгендә дөньякүләм мәдәни вакыйга булды — Башкортстан Республикасы Русия Федерациясен тәкъдим итте, ул фольклор, туризм, кунакчыллык һәм җир йөзендәге төрле халыкларның иҗади аралашу мәйданчыгына әверелде. 3 июльдә Уфада Башкортстан Башлыгы Радий Хәбиров VI Бөтендөнья фольклориадасын ачу тантанасында чыгыш ясады.
Фольклориадада дөньяның 37 иле делегациясе катнашты. Проект 1020 катнашучыны, 70 һөнәрчене җыйды. Уфадагы Фольклориада кысаларында бер әйлән-бәйләндә илләр һәм милләтләр саны буенча ике дөнья рекорды куелды. Дуслык әйлән-бәйләне 57 ил һәм 71 милләт вәкилен җыйды. Гомумән, әйлән-бәйләндә 2700дән артык кеше катнашты.
“Уфа-Арена”да Фольклориаданы ачу тантанасында 1000 артист катнашты. Ябылу тантанасында “Торатау” Конгресс-холлы каршында дөньяның 19 иле вәкилләре чыгыш ясады, алты истребитель катнашлыгында авиашоу узды. Халыкара форум чараларының 8 көнендә Башкортстанда 100 меңнән артык кеше булды. Уфада төп сәхнәдә һәм 22 районда һәм шәһәрдә Фольклориада вакытында 28 концерт мәйданчыгында 61 концерт күрсәтелде.
6 августта Русия Президенты Владимир Путин эш сәфәре белән Башкортстанда булды. Аерым алганда, дәүләт җитәкчесе Владимир Путин, Башкортстан Башлыгы Радий Хәбиров һәм “Lasselsberger” компанияләр төркемен гамәлгә куючы Йозеф Ласселсбергер Әбҗәлил районында ак цемент җитештерү буенча “Цемикс” заводын эшләтеп җибәрү тантанасында катнаштылар.
Шул ук көнне Владимир Путин Радий Хәбиров белән эшлекле очрашу үткәрде. Төбәк җитәкчесе дәүләт башлыгына республикадагы социаль-икътисади хәл турында җиткерде.
25-29 августта башкалабыз төрле төбәкләрдән килгән яшь осталарны кабул итте. Уфада “Яшь профессионаллар (WorldSkills Russia)-2021” IX чемпионатының финалы традицион форматта узды. Уфаның “Ватан” паркында Милли чемпионат финалын ачу тантанасында Башкортстан Башлыгы Радий Хәбиров һәм Һөнәри осталыкны үстерү агентлыгының (Ворлдскиллс Русия) генеральный директоры Роберт Уразов катнаштылар.
Уфада узган ярышларда Русиянең 76 төбәгеннән 2000 конкурсант катнашты. Башкортстан җыелма командасына 280 катнашучы һәм 218 эксперт керде. Гомум зачет нәтиҗәләре буенча ул Санкт-Петербург командасы белән икенче урынны бүлеште.
8 сентябрьдә Башкортстан Башлыгы Радий Хәбиров ел саен уза торган “туры элемтә” үткәрде. Дүрт сәгать дәвамында төбәк җитәкчесе республика халкының һәм журналистларның 58 соравына җавап бирде.
19 сентябрьдә Уфада Башкортстан Башлыгы Радий Хәбиров “Сайлаулар төне”ндә катнашты, ул “Сайлаулар – 2021” иҗтимагый матбугат үзәгендә узды. Төбәк җитәкчесе журналистлар, блогерлар, җәмәгать эшлеклеләренең сорауларына җавап бирде һәм Русия Дәүләт думасы депутатларын сайлаулар буенча өч көнлек тавыш бирүгә, шәһәр һәм районнар советларына, шулай ук Дәүләт җыелышы-Корылтайга өстәмә сайлауларга йомгак ясады.
11 октябрьдә башкаланың “Торатау” Конгресс-холлында Республика көненә багышланган тантаналы җыелыш үтте. Чарага республиканың шәрәфле шәхесләре, хезмәт алдынгылары, хөрмәтле ветераннар җыелды.
15 октябрьдән 14 ноябрьгә кадәр Русиядә үткәрелгән халык санын алуны оештыру буенча Башкортстанда колачлы эш башкарылды. “Башстат” хәбәр итүенчә, халык санын алу республикада яшәүчеләрнең барысын да колачлый алган. Беренчел мәгълүматлар буенча, төбәктә 4,1 миллионнан артык кеше исәпкә алынган.
Бөтенрусия халык санын алуда катнашу буенча Башкортстан лидер төбәкләр арасына керде, дип билгеләде “Росстат” җитәкчесе Павел Малков Русия Президенты Владимир Путинның Хөкүмәт әгъзалары белән үткәргән киңәшмәсендә.
Башкортстан Башлыгы Радий Хәбиров Русия Федерациясе Дәүләт Советы Президиумының яңа составына керде. 15 ноябрьдә тиешле документка ил Президенты Владимир Путин кул куйды.
4 декабрьдә Мәскәүдә Башкортстан Башлыгы, “Бердәм Русия” партиясенең төбәк бүлекчәсе җитәкчесе Радий Хәбиров партиянең XX съездының өченче этабы эшендә катнашты.
Видеоконференция режимында съезд делегатларына Русия Президенты Владимир Путин мөрәҗәгать итте. Дәүләт башлыгы партияне 20 еллыгы белән котлады һәм “Бердәм Русия” оешкан вакыттан бирле аның көчле ягы ил өчен җаваплылыкны үз өстенә алуын, кешеләр өчен эшләвен билгеләде.
Тавыш бирү нәтиҗәләре буенча Дмитрий Медведев — партия рәисе, ә Борис Грызлов “Бердәм Русия”нең Югары советы рәисе итеп сайланды. Радий Хәбиров партиянең Генераль советы составына керде.
Фәнүз ХӘБИБУЛЛИН.
