Белоруссия һәм Русия төбәкләренең XI форумының пленар утырышы узды

Форумда катнашучыларга видеомөрәҗәгатьне Русия Президенты Владимир Путин да җибәргән.

- Әлеге форумның Союз дәүләтенең инновацион икътисадын төзүдә төбәкара хезмәттәшлек роленә багышлануы мөһим. Тема – иң актуаль темаларның берсе, чөнки хуҗалык тормышының барлык өлкәләренә яңа технологияләр кертү, сәнәгатьнең һәм авыл хуҗалыгының фәнни күп таләп итүче тармакларын үстерү мәсьәләләрен хәл итү белән хәзер Русиядә дә, Белоруссиядә дә актив шөгыльләнәләр, – диде Владимир Путин.

Форум делегатларына видео-сәламләүне Белоруссия президенты Александр Лукашенко җибәргән. Ул еллык эшлекле чараның нәтиҗәлелеген югары бәяләде.

- Тышкы басымга карамастан, Беларусь һәм Русия ышаныч белән алга баралар, Союз интеграциясен үстерәләр һәм гуманитар элемтәләрне ныгыталар, – дип ассызыклады Александр Лукашенко. – Төбәкләр форумы-Союз дәүләтенең иң уңышлы һәм нәтиҗәле проектларының берсе дип саныйм. Ул уникаль диалог мәйданчыгына әверелә, үзенең үзенчәлекле, кабатланмас стилен ала һәм кыю, амбициоз башлангычлар белән үсүен дәвам итә.

Пленар утырышта шулай ук Русия һәм Белоруссия парламентлары вәкилләре, ике ил хөкүмәтләре әгъзалары, министрлык һәм ведомство җитәкчеләре, төбәк губернаторлары чыгыш ясады. Алар төрле дәрәҗәдә уңышлы хезмәттәшлек тәҗрибәсе белән уртаклаштылар һәм Союз дәүләте кысаларында дәүләтара хезмәттәшлекне алга таба ныгыту буенча берничә тәкъдим керттеләр.

Журналистлар белән әңгәмәдә Башкортстан Башлыгы Радий Хәбиров республика делегациясенең Беларуська визитына йомгак ясады.

- Бу башкорт-белорус мөнәсәбәтләрен үстерүдә һәм ныгытуда чираттагы этап дип саныйм, - дип ассызыклады төбәк җитәкчесе. - Без өч өлкә белән сөйләшүләр уздырдык. Һәр очрашуның үз үзенчәлекләре бар иде. Көннең иң мөһиме - машина төзелеше өлкәсендәге хезмәттәшлек. Шул ук вакытта авыл хуҗалыгы өлкәсендә дә тәкъдимнәр бар. Гомумән, белоруслар - бик эшлекле партнёрлар, үзләренең килешүләренә җаваплы караган предприятие җитәкчеләре.

Республика Башлыгы шулай ук туризм өлкәсендә Белоруссия ягы белән уртак проектларның югары потенциалын билгеләп үтте.

Фото: glavarb.ru