+9 °С
Болытлы
Барлык яңалыклар
Сәясәт
13 сентябрь , 10:10
“Төп бурыч – Президент билгеләгән гомумдәүләт максатларына ирешү!”
Радий Хәбировның Башкортстан Башлыгы вазыйфасына керешү тантанасы үтте 12 сентябрьдә республиканың иҗтимагый-сәяси тормышында мөһим вакыйга булды: яңа срокка сайланган Радий Хәбиров рәсми рәвештә Башкортстан Башлыгы вазыйфасын үти башлады. Дәүләт җыелышы-Корылтай йортында үткән инаугурациядә Русия Президентының Идел буе федераль округындагы Тулы вәкаләтле вәкиле Игорь Комаров, Башкортстанның Үзәк сайлау комиссиясе әгъзалары, Федерация Советы сенаторлары, республика Хөкүмәте әгъзалары, Дәүләт думасы һәм Дәүләт җыелышы-Корылтай депутатлары, Башкортстан буенча Баш федераль инспектор Алексей Касьянов, Конституция Советы әгъзалары, федераль ведомстволарның территориаль органнары һәм республика башкарма власть органнары җитәкчеләре, хокук саклау һәм суд органнары җитәкчеләре, районнар һәм шәһәрләр хакимиятләре башлыклары, Уфа шәһәре советы президиумы әгъзалары, республика Башлыгы вазыйфасына кандидатның ышанычлы кешеләре, хезмәт коллективлары, иҗтимагый оешмалар, традицион дини конфессияләр, фәнни һәм иҗади интеллигенция вәкилләре катнашты.
“Төп бурыч – Президент билгеләгән гомумдәүләт максатларына ирешү!”
Чараны Дәүләт җыелышы-Корылтай Рәисе Константин Толкачев ачты һәм алып барды.
– Хөрмәтле тантанада катнашучылар! Без сезнең белән мөһим иҗтимагый-сәяси вакыйга – Башкортстан Республикасы Башлыгының вазыйфасын үти башлавының шаһитлары. Бу вакыйга якындагы елларга республиканың тарихы, үсеш тенденцияләре белән бәйле, – диде парламент спикеры. – Башкортстан Конституциясе нигезендә республика Башлыгы кеше һәм гражданның хокукларын һәм ирекләрен гамәлгә ашыруны гарантияли, Башкортстанның икътисади һәм сәяси мәнфәгатьләрен яклый, аның территориясендә законлылык һәм хокук тәртибен тәэмин итә, төбәкнең социаль-икътисади үсешенең төп юнәлешләрен билгели. 8 сентябрьдә Башкортстан Башлыгы итеп Радий Фәрит улы Хәбиров сайланды.
Русия һәм Башкортстан гимннары яңгырагач, залга Башкортстан Республикасы флагы һәм Конституциясе кертелде.
Константин Толкачев Башкортстан Үзәк сайлау комиссиясе рәисе Азат Галимхановка сүз бирде.
– Башкортстан Республикасының Сайлаулар турында кодексының 84 статьясы нигезендә республиканың Үзәк сайлау комиссиясе 8 сентябрьдә узган Башкортстан Башлыгын сайлау нәтиҗәләрен билгеләде, – диде Азат Галимханов. – Сайлауларда 2 миллион 153 мең 513 сайлаучы катнашты, бу исемлеккә кергән сайлаучыларның 72,34 процентын тәшкил итә. Радий Хәбиров өчен 1 миллион 724 мең 962 сайлаучы тавыш бирде, ягъни тавыш бирүчеләрнең 80,21 проценты. Башкортстан Үзәк сайлау комиссиясе агымдагы елның 8 сентябрендә Башкортстан Башлыгын сайлауларны узган һәм дөрес дип таныды. Ул Башкортстан Башлыгы итеп Радий Фәрит улы Хәбировның сайлануын билгеләде.
Азат Галимханов Радий Хәбировны бу җиңүе белән котлады һәм аңа Башкортстан Башлыгы таныклыгын тапшырды.
Тантанада төбәк җитәкчесе ике дәүләт телендә — башкорт һәм урыс телләрендә Башкортстан халкына ант бирде, аның тексты республика Конституциясендә беркетелгән.
— Башкортстан Республикасы Башлыгы вәкаләтләрен тормышка ашырганда Башкортстан Республикасының күпмилләтле халкына тугры хезмәт итәргә, Башкортстан Республикасының дәүләтчелеген ныгытырга һәм якларга, Русия Федерациясе Конституциясен һәм Башкортстан Республикасы Конституциясен үтәргә, кеше һәм гражданның хокукларын һәм ирекләрен гарантияләргә ант итәм, — диде Радий Хәбиров һәм Башкортстан Башлыгы анты текстына кул куйды. Шул мизгелдән, республика Конституциясенең 84нче һәм 85нче статьяларына ярашлы, Радий Хәбиров Башкортстан Башлыгы вазыйфасын үти башлады.
Русия Президентының Идел буе федераль округындагы Тулы вәкаләтле вәкиле Игорь Комаров Радий Хәбировны җиңүе бәлән котлады.
– Халык Сезгә якындагы биш елга аларның мәнфәгатьләрен якларга, тормыш сыйфатын яхшыртырга һәм төбәкне үстерергә яңадан ышаныч белдерде. Сезнең җитәкчелектә бик күп әһәмиятле проектлар гамәлгә ашырыла, алар республика халкы тарафыннан ярдәм һәм хуплау тапты. Башкортстан – Русиянең терәк төбәкләренең берсе, эре индустриаль һәм аграр үзәк, ул илебез икътисадына зур өлеш кертә. Сәнәгать җитештерүе күләмнәре буенча республика Русиянең 15 лидер-төбәге исәбенә һәм округтагы иң эре өчлеккә керә. Авыл хуҗалыгы продукциясе җитештерү буенча – округта икенче урында, инвестицияләр динамикасы буенча шулай ук Идел буе федераль округы буенча өчлеккә керә. Бу – республика Башлыгы командасының уңай эшлекле мохит булдыруга игътибар бирү нәтиҗәсе. Инвестицияләр дәүләт рейтингында төбәк – ил буенча лидерлар өчлегендә. Республика оборона сәнәгате өлкәсендә үз мөмкинлекләрен актив үстерә, югары технологияле тармакларның фәнни потенциалын арттыра. Төбәк власте һәм шәхсән Сез, Радий Фәрит улы, СВО ветераннарына һәм аларның гаилә әгъзаларына зур ярдәм күрсәтәсез. Ватанны саклаучыларга социаль ярдәм күрсәтүнең һәм ярдәмнең нәтиҗәле эшләүче системасын үстерү, хәрби хезмәткәрләрнең гаиләләренә максатлы ярдәм итү беренче чираттагы бурычларның берсе булып кала, – дип ассызыклады Игорь Комаров. – 2023 елда Башкортстанга сәфәре кысаларында Русия Президенты Владимир Путин төбәкнең ил язмышында Ватанны һәм дәүләтебез чикләрен саклау белән бәйле аерым ролен билгеләп үтте.
Игорь Комаров Радий Хәбировка һәм аның командасына нәтиҗәле һәм уңышлы эш, казанышлар һәм Башкортстан халкы файдасына барлык планнарны тормышка ашыруны теләде.
Радий Хәбиров сайлауларда күрсәткән ышаныч өчен чын күңелдән рәхмәт белдерде.
Инаугурациядә Радий Хәбиров ассызыклавынча, узган сайлаулар нәтиҗәләре – барлык дәрәҗәдә идарә командасының эшенә югары бәя бирү ул һәм кешеләрнең тормыш сыйфатын яхшырту, икътисадны һәм социаль өлкәне үстерү, шәһәр һәм авылларны төзекләндерү, Башкортстанның илнең әйдәүче төбәкләренең берсе буларак позициясен ныгыту белән бәйле.
– Мин Русия Президенты Владимир Путинга рәхмәтле, ул миңа ышаныч белдерде һәм Башкортстан Башлыгы постына дәгъва итүемне хуплады. Иң мөһиме, бу елларда Владимир Путин безнең республикада мөһим башлангычларны гамәлгә ашыруда актив ярдәм итте, тормышның барлык якларын үстерүгә йогынты ясады, – диде Радий Хәбиров.
Ул шулай ук Ватанны саклаучы махсус хәрби операциядә катнашучыларга аерым рәхмәт белдерде.
– Башкортстан сезнең белән горурлана. Исән-сау, җиңү белән әйләнеп кайтуыгызны телибез, – диде Радий Хәбиров.
Башкортстан Башлыгы үз чыгышында алдагы биш елга планнары турында сөйләде.
– Кадерле дуслар! Алда – биш ел киеренке эш. Алар да гади булмаячак. Шул ук вакытта соңгы еллардагы кыенлыкларга сылтау ясамаячакбыз. Бу бары тик алга таба хәрәкәт итәргә комачаулаячак. Шушы катлаулы борылыш вакыты безне көчлерәк һәм бердәм итәчәк. Алга таба да илебезнең алдынгы сәнәгать, фән, мәгариф, спорт үзәге буларак, Башкортстан позицияләрен ныгытачакбыз. Моның өчен бездә барысы да: табигый ресурслар, күптармаклы икътисад, заманча инфраструктура, югары технологияләр һәм компетенцияләр бар. Ә иң мөһиме – үз язмышын Башкортстанның киләчәге белән бәйләүче, балалары һәм оныклары, туган җирләре үсешенә, туган ягыбызның чәчәк атуына өлеш кертергә омтылучы кешеләр, – диде Радий Хәбиров. – Без киләчәккә ышаныч белән карыйбыз, масштаблы планнар төзибез. Башкортстанны тагын да көчлерәк һәм чәчәк атучы төбәк итәчәк мөһим проектларны һәм программаларны тормышка ашырабыз. Һәр йортка, ишегалды, подъездга, һәр кешегә барып җитәчәкбез. Ышанам, бергәләп алдыбызга куелган барлык бурычларны хәл итәчәкбез. Хөрмәтле якташлар! Республиканың киләчәге – безнең кулда! Без бергә! Бергәләп теләсә нинди, иң катлаулы сынауларны җиңәчәкбез. Бөтен планнарыбызны тормышка ашырачакбыз. Без бердәм һәм бергә җиңәчәкбез! Алга, республикам! Алга, Башкортстан!
Фәнүз ХӘБИБУЛЛИН.
Читайте нас:
© 2019-2024 “KizilTan” электрон басмасы элемтә, мәгълүмат технологияләре һәм киңкүләм коммуникацияләр өлкәсендә күзәтчелек буенча федераль хезмәт тарафыннан теркәлгән.
Теркәлү саны: 2019 елның 24 маендагы Эл сериясе № ФС 77-75682.
Басманың яшь категориясе 12+
___________________
Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)
Регистрационный номер: серия Эл № ФС 77-75682 от 24 мая 2019 г.
Возрастная категория издания 12+
Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.
____________________
УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».
Баш мөхәррир Фаил Камил улы Фәтхетдинов.
Кабул итү бүлмәсе телефоны: 8 (347) 272-13-61.
___________________
Главный редактор: Фатхтдинов Фаил Камилович.
Телефон приемной: (347) 272-13-61.
Телефон
8(347)272-13-61
Электрон почта
kyzyltan@mail.ru
Адресы
450079, Уфа шәһәре, Октябрьнең 50 еллыгы урамы, 13 нче йорт
Реклама хезмәте
8(347)272-62-27
Хезмәттәшлек
8(347)272-62-27