Владимир Путинның Александр Лукашенко белән сөйләшүләре узды

Русия-Белоруссия сөйләшүләре тәмамлангач, лидерлар уртак белдерүгә кул куйды, аннары Белоруссия Президентының Русиягә рәсми сәфәре барышында кул куелган документлар белән алмашу тантанасы булды.

Владимир Путин һәм Александр Лукашенко киңүләм мәгълүмат чаралары өчен белдерүләр белән чыгыш ясады һәм журналистларның сорауларына җавап бирде.

- Александр Лукашенконы Кремльдә сәламләвемә чын күңелдән шатмын. Бу
- Александр Григорьевичның Белоруссия Президенты постына яңадан сайланганнан соң беренче чит илгә сәфәре. Һәм без мондый адымны югары бәялибез, шуның белән ике тугандаш ил арасындагы мөнәсәбәтләрнең үзенчәлекле характеры ассызыклана, - диде Владимир Путин. - Белоруссия һәм Русия - якын күршеләр генә түгел, ышанычлы союздашлар, чын стратегик партнерлар һәм чын дуслар. Безнең хезмәттәшлегебез нигезендә бер-береңне хөрмәт итүнең һәм мәнфәгатьләрне исәпкә алуның какшамас принциплары, шулай ук күп кенә русиялеләр һәм белоруслар арасында тыгыз тугандаш багланышлар, уртак әхлакый һәм рухи кыйммәтләргә бирелгәнлек урнашкан күпгасырлык уртак тарих ята.

Александр Григорьевич белән бүгенге сөйләшүләр нәкъ менә шундый традицион дустанә, эшлекле һәм конструктив атмосферада узды. Без икътисадта, мәдәни-гуманитар өлкәдә, иминлек һәм оборона өлкәсендә икеяклы хезмәттәшлекнең барлык төп мәсьәләләрен җентекләп карадык диярлек. Актуаль халыкара һәм төбәк мәсьәләләре буенча фикер алыштык.

Фото: kremlin.ru