Агыйделдә бизнесны һәм социаль инфраструктураны үстерүгә басым ясалды

19 августта Агыйделдә Башкортстан Башлыгы Радий Хәбиров шәһәрнең иҗтимагый оешмалары, депутатлар, дин әһелләре, волонтёрлар һәм махсус хәрби операциядә катнашучылар белән очрашты. Алар муниципалитетның социаль-икътисади үсеше һәм киләчәккә планнар турында фикер алышты.

Республика Башлыгы Агыйделнең тотрыклы үсешен дәвам итүен билгеләп, кече һәм урта бизнесны үстерүне шәһәр өчен төп юнәлешләрнең берсе дип атады. Аның сүзләренчә, шулай ук табигый мөмкинлекләрдән файдаланырга, җәмәгать киңлекләрен төзекләндерергә һәм юлларны ремонтларга кирәк. Моның өчен муниципалитетка өстәмә финанслау бүлеп биреләчәк.

Шәһәрдәге Мәдәният йортын киләсе елда яңарту планлаштырыла. Бина тыштан һәм эчтән ремонтланачак, янәшәдәге территория дә төзекләндереләчәк.

Агыйделдә һөнәри белем бирүне дә киңәйтергә ниятлиләр. Уфа ягулык-энергетика көллиятенең шәһәрдәге филиалында ихтыяҗ зур булган белгечлекләр, шул исәптән педагогик һәм медицина юнәлешләре буенча кадрлар әзерләү мөмкинлеге карала.

Очрашуда инвестиция проектлары турында да сөйләштеләр. Санкт-Петербургның «НИА Инжиниринг» компаниясе Агыйделдә вакуум-плазма җиһазлары җитештерү предприятиесе ачарга планлаштыра. Компаниянең төбәктә юридик заты инде теркәлгән.

Киләчәктә Агыйдел территориясен «Алга» махсус икътисади зонасына кертү мөмкинлеге дә карала. Хәзер шәһәрдә бизнес өчен республика преференциаль режимы гамәлдә.

Очрашуда шулай ук махсус хәрби операциядә катнашучыларга һәм аларның гаиләләренә ярдәм, коммуналь инфраструктураны яңарту, балалар сәнгать мәктәбен ремонтлау, креатив индустрияләрне үстерү һәм туризм мәсьәләләре күтәрелде.

Радий Хәбиров Агыйделдә тагын бер парк төзекләндерү, балалар бакчасы, китапханә һәм музейны тәртипкә китерү планнары барлыгын да әйтте.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102