Башкортстан «Технопром-2026» форумында алдынгы технологияләрен тәкъдим итте

25–28 августта Новосибирскида XIII Халыкара технологик үсеш форумы «Технопром-2026» узды. Анда Башкортстаннан 14 кешелек делегация катнашты. Республика вәкилләре фәнни-технологик үсеш һәм кадрлар әзерләү мәсьәләләре буенча фикер алышуларда катнашты.

Башкортстан Фән һәм югары белем буенча дәүләт комитеты рәисе Светлана Мостафина төбәкләрнең фәнни-технологик үсешен җитәкләүгә багышланган стратегик сессиядә чыгыш ясады.

– Мондый проектларда катнашу – безнең югары уку йортлары, студентлар һәм яшь галимнәр өчен дөнья дәрәҗәсендәге тикшеренүләргә юл. Республикада фән – өстенлекле юнәлеш, шуңа күрә без алдынгы сафта булырга тиеш, – диде ул.

Форумда Башкортстанның фәнни оешмалары һәм югары уку йортлары үз эшләнмәләрен дә тәкъдим итте. Уфа дәүләт нефть техник университеты нефть-газ тармагы өчен санлы игезәкләр, скважиналар белән автоном идарә итү һәм программ тәэминаты өлкәсендәге проектларын күрсәтте.

Делегация вәкилләре шулай ук «Себер боҗралы фотоннар чыганагы» (Сибирский кольцевой источник фотонов, «СКИФ») коллектив файдалану үзәгендә булды. Мегасайенс классына караган бу корылма матдәнең төзелешен атом дәрәҗәсендә өйрәнергә, яңа материаллар һәм дару препаратлары эшләргә мөмкинлек бирә.

Форумда быел 75 төбәктән һәм 39 илдән якынча 12 мең кеше катнашты.