Азан тавышы тынмасын

— Безнең Саузбаш авылы Иске Саузбаштан күченеп килде. Су басу зонасында дип, безне өскәрәк күчер­деләр. Элекке авылыбызда бик матур мәчет бар иде. Әлеге Саузбаш авылына 34 ел, әмма әлегә кадәр мә­четебез булмады. Менә, Аллаһыга шөкер, үзебездә иман йорты ачылды, — дип шатлана авыл картлары.
Саузбашта 470 кеше яши, өлкәннәрнең дә, яшь­ләрнең дә мәчеткә йө­рергә теләге зур.
Мәчет төзелешен авыл­ның өч эшкуары — Салават Исламов, Илфак Гәрәев, Рамил Ибраһимов финанслаган. Шундый саваплы эш өчен авылдашлары бик рәхмәтле аларга.
— Авыл халкы да читтә калмады, кулдан килгәнчә ярдәм итәргә тырышты, аеруча Рәфкыя һәм Фаязит Акмаловларга, Тәлгать Камалов һәм Гөлфая Гайнетдиновага, Җиһаншиннарга, Зәбирә һәм Әсһәр Ганиевларга, Рәшит Маликовка, Фәнзилә Гыйздуллинага рәхмәтлемен, изге эшләре үзләренә яхшылык булып әйләнеп кайтсын, — ди авыл советы рәисе Эльза Хәерт­динова.
Яңа мәчеткә имам итеп Агыйдел шәһәреннән Хәдит хәзрәт тәгаенләнде.
— Бүген ачылган изге йортыбыз авыл халкын, милләттәшләребезне, дин кардәшләребезне туплап торучы урынга әйләнер, яшь буынны тәрбияләүгә, милләт­ләр дуслыгын ныгытуга үз өлешен кертер, дип ышанам. Саузбаш мәчетенең һәр­вакыт тулы булуын, азан тавышы тынмавын телик. Биредә яшьләр дә дин гыйлеме алыр, мәчетебез мәгъ­рифәт йортына әйләнер, дип ышанам. Өлкәннәр юкка гына: “Белем юлы — җәннәт юлы” дип әйтмәгән, — диде авыл халкын әлеге мөһим вакыйга белән котлап район хакимиятенең авыл хуҗа­лыгы идарәсе җитәкчесе Динис Биков.
Кунаклар саузбашлыларны әлеге бәйрәм белән котлады, бүләкләр тапшырды.