-15 °С
Болытлы
Гәзиткә язылуVKOKTikTokINSTAGRAM
Барлык яңалыклар
Төрлесеннән
8 ноябрь 2014, 22:03

Умартачы үзе дә бал кортыдай эшләргә тиеш

Эштән курыкмаучы, үз көченә ышанган, булдыклы кешеләр бервакытта да заманга зарланып, кул кушырып утырмый, кемнедер гаепләп, үзен жәлләтеп, гомерен бушка уздырмый. “Эш эшләми, уңыш килми; кәсеп итми, табыш килми”, дигән халык мәкале бар. Бу сүзләр Аскын авылында яшәүче Шәйбәковлар гаиләсе турында да әйтелгән кебек.

Бал базарында көндәшлек көчле булуга карамастан, гаилә үз юлын таба: республиканың төньяк төбәге умартачыларын барлык кирәк-ярак белән тәэмин итүче кибет ача алар. Сәүдә эше төп шөгыль — умарталык карау белән бергә бара.
— Умартачы җәй айларында гына эшли дип уйлаучылар ялгыша. Умартачылык — авыр, ел әйләнә­сенә сузылган көндәлек хезмәт. Умартачы үзе дә бал кортыдай эшләргә тиеш, — дип тәҗрибәсе белән уртаклашты Марат Шәйбәков.
Хезмәт нәтиҗәләрдә күре­нә. Шәйбәковлар ел саен 2 тонна бал, 15 килограмм балавыз һәм утыз килограммга якын чыршын җыеп ала. Продукция, берсүзсез, гаиләгә тоемлы керем бирә. Әмма гаилә башлыгы ирешкәнендә генә туктап калмый. Респуб­ликаның төньяк районнары умартачылары кәрәзгә бик интеккән чакта эшкуар Чишмә районыннан кәрәз алып кайтып сата башлый. Тиздән тагы яңа идея туа һәм кәрәзне үзләре җитештерә башлый. Әйтергә кирәк, бүген Шәйбәков­лар бу эштә дә зур уңышка ирешә — елына уртача 36 тонна кәрәз җитештерәләр.
— Барлык эшкә дә ничек өлгерә­сез? — дип сорыйм.
— Һәр көн планнар белән тулы булырга тиеш. Шөгылең бар икән, өстәвенә, ул синдә кызыксыну да уята икән, димәк, вакыт юклыкка сылтанып булмый. Вакытны дөрес бүлә белү мөһим. Үзеңне яңа өлкәдә дә сынап караудан курыкмаска һәм һәрвакыт камиллеккә омтылырга кирәк.
Шәйбәковлар берничә ел рәттән Мәскәүдә уздырылган “Алтын көз” агросәнәгать күргәзмә­сеннән медаль белән кайткан. Ә мәртәбәле чарага әзерлек күпкә алдан башлана: анда җитештер­гән продукцияне күрсәтү генә түгел, ә матур итеп презентация­ли белү дә мөһим. Мәскәүлеләргә Гөлназ белән Марат төрле сорттагы балны матур банкаларга тутырып сата, косметология һәм медицинада кулланылучы бал продукциясен дә тәкъдим итә.
Шәйбәковлар үз алдына һәрва­кыт тормышчан максат куя белә, шуңа да аңа ирешмичә калмыйлар.