Завод язмышы “чүкеч” кулында

Дусларга караганда, кесәдәге “йөз сум” акча белән проблемаларны тизрәк һәм җиңелрәк хәл итеп була торган заманда яшибез. Хәзер эре бизнес вагракларын “йота”. Теше үтмәгәндә, банкротка чыгарып, милек хуҗаларын алыштыру тәртибе дә бар. Беренче карашка, боларны базар мөнәсәбәтләре шартларында табигый, була торган хәл дип тә кабул итәргә мөмкин иде. Әмма эре бизнес белән, бигрәк тә аның артында власть структуралары торганда, бәхәсләшү дә, үз хокукларыңны дәлилләү дә гаять авыр.
Бүген гәзит укучыларны Стәр­летамак умартачылык инвентарьлары җитештерү заводын ничек итеп төзелеш бизнесы “йотарга” әзерләнүе хакында таныштырмакчыбыз. Шәһәр хакимияте, 100 процент акция иясе буларак, әлеге предприятие зыянга эшли дигән сәбәп белән, аның җитәкчесен алыштырырга һәм ышанычлы чыганакларга караганда, булган мөлкәтне төзелеш бизнесына тапшырырга карар итә. Күптән түгел “Башинформ” агентлыгы сайтында, хәтта, сәүдә-сатуга чыгарыласы тәкъдим, аукционның техник яклары бәян ителгән иде.
Умартачылык инвен­таре җи­тештерүче иле­бездәге бердәнбер завод продукциясенә ихтыяҗ юкмы, әллә шәһәр хаки­мияте, җәмәгать­челеккә, Дәүләт җыелышы-Корылтай депутатларына, Авыл хуҗалыгы министрлыгы җитәкчелегенә дөрес­лектән ерак торган мәгълүмат би­реп, үзе дә эре бизнес корбанына әйләнгәнме?

Русиядә бердәнбер

“Стәрлетамак умартачылык инвентаре механика заводы” җәм­гыяте Русиядә әлеге тармак их­тыяҗлары өчен продукция җи­тештерүче иң өлкән предприятие. Умартачылар өчен кирәк-яракны биредә 1950 еллар уртасында эшли башлыйлар. 1968 елда завод РСФСРның “Пчелопром” бер­ләшмәсенә тапшырыла. 1971 елда Мәскәүдә узган умартачылык продукциясе буенча XXIII халыкара күргәзмәдә катнашып, алтын, көмеш, бронза медальләргә лаек була.
1980 елларда предприятие елына уннарча мең бал аерту һәм балавыз әзерләү җиһазлары җитештерә башлый. Заводта эшче­ләр саны 350 кешегә җитә. Әйт­кәндәй, СССРда мондый продукция бирүче заводлар нибары икәү генә була. Таганрогтагысы ябылгач, хәзер Русиядә Стәр­летамак заводы үзе генә калган. Димәк, бүгенге базар шартларында алар белән көндәшлек итүче юк һәм стәр­летамаклылар продук­циясенең ил, дөнья базарына чыгу мөмкинлеге бар дигән сүз.
Заводта бүген 50дән артык кеше эшли. Цехларда умартачылык тармагы өчен 28 төр продукция җитештерелә. Аның шактый өлеше илнең башка төбәкләренә озатыла. Сәүдә итү мәйданчыгы елдан-ел арта. Завод милкендә дәүләт өлеше 100 процент тәшкил итә.