+19 °С
Болытлы
Гәзиткә язылуVKOKTelegramЯRus
Барлык яңалыклар
Төрлесеннән
30 декабрь 2014, 22:05

Кыш бабайдан өч бүләк!

Узган ел тәмамланыр алдыннан без гәзит укучыларны Борай районы үзәгендә яшәүче Хаҗипов­лар гаиләсендә туган 3 игезәк — Камил, Эмиль һәм Дарина белән таныштырган идек. Алар бүген ничек үсә, Кыш бабайны ничек каршыларга җыена икән?

Игезәкләр — Светлана һәм Айдар Хаҗиповларның мәхәб­бәт җимеше. Яшьләр 2006 елда өйләнешә. Айдар Борай районы хакимиятенең финанс идарәсендә әйдәүче белгеч булса, Светлана 3нче Борай гомуми белем бирү мәктә­бендә укыта, “Ел укытучысы” республика бәйгесендә финалга чыгып абруй казанган.
Башкаланың Г. Куватов исемендәге Республика клиник дәваханәсендә дөньяга аваз салган сабыйлар бер яшьләре тулыр-тулмас тәпи киткән, хәзер инде өйнең бер почмагы да аларның игътибарыннан читтә калмый. Туганнарыннан ике-өч сантиметрга озынрак булып туган Эмиль бүген дә алардан буйчанрак. Сары чәчле, зәңгәр күзле, тыныч холыклы, акыллы малай күбрәк әтисенә охшаган. Ул үзенә-үзе шөгыль табып, тыныч кына уйнап утырырга ярата.
Аның каравы, туганнары – ике ут бөрчәсе! Камил кап-кара чәчле, түп-түгәрәк, шук малай. Аның өлгермәгән җире юк. Яңалыкны ярата, үзенә-үзе ачышлар ясап сөенә. Дарина да аннан калышмый. Ул иң беренче булып тәпи киткән. Кая булса да үрмәләргә ярата, усаллыгын да күрсәтеп ала. Әниләре Светлана әйтүенә караганда, аларны тәрбиялә­шергә нәнәй-картәтиләр булыша, алар хәтта үзләренә расписание төзеп куйган – кемнең кайчан киләсе алдан билгеле. Ә бәйрәмнәрдә ишле гаилә бергә җыела. Яңа елда да шулай булачак, билгеле. Кыш бабай капчыгыннан аларга өч бүләк чыгачак!
“Кыш бабайдан ниләр көтәсез?” — дигән сорауга, өч бала анасы Светлана Ха­җипова: “Аңардан балаларыма исәнлек, ил-көнгә тынычлык өмет итәм. Күз нурларыбызны түгеп үстергән улларыбыз ут эченә кермәсен, кызларыбыз сау-сәламәт булып үсеп, нәселне дәвам итсен. Тагын бер теләгем бар: улларыбызга яңа нигез корыр өчен җир алып, йорт салырга исәп. Кыш бабай тылсымлы таягы белән аның ызанын билгеләп китсә, бик шат булыр идек!”
Читайте нас в