Бәйләнешләр нык, халык мәгълүматка тук булсын

Нәтиҗәле берлектәге эшкә республика тармак семинарлары да булышлык итә. Әгәр дә семинарлар, беренче чиратта, жур­налистлар өчен уку мәйдан­чыгы булса, кичә башкалада үткән чара анык проблемаларны уртага салып, тигез хокукларда сөйләшүне күздә тотучы бәхәс мәйданы булды. “Башкортстан Республикасында матбугат хезмәтләре һәм киңкүләм мәгълүмат чаралары: нәтиҗәле аралашуның төп аспектлары” дип аталган медиа­форумда дәүләт һәм муниципаль властьларның PR-структура­лары һәм матбугат хезмәт­ләре, федераль һәм төбәк журна­листлары һәм мөхәррирләр, сәнәгать һәм коммерция предприя­тиеләре матбугат хезмәтләре вәкилләре катнашты.
Чараның рәсми өлешендә Башкортстан Республикасы Башлыгы Хакимияте җитәкчесенең эчке сәясәт буенча урынбасары Максим Михайлов, Хөкүмәт Премьер-министры урынбасары Евгений Маврин һәм башка рәсми вәкилләр чыгыш ясады, журналистлар сорауларына җавап бирде.
— Безгә бәйләнешләрне тагын да ныгытырга һәм проблемаларны аныграк яктыртырга кирәк. Бүген халыкны икътисади проблемалар ныграк борчый. Аларга объектив бәя бирү зарур. Мәгълүмати ачыклык мәсьәләсендә проблемалар бар. Күп оешмалар матбугат чараларын нинди­дер уңай яңалыклары булса гына исенә төшерә. Объектив­лык өчен кирәк булса, кире якларны да яшерергә ярамый, чөнки ул хәбәр барыбер халыкка барып җитә. Һәм күп очракта төрле имеш-мимеш белән баетылып, тузга язмаган хәлдә. Халыкка дөрес мәгъ­лүмат җиткерергә кирәк, моның өчен барыбызның да килешеп эшләве шарт, — диде Максим Михайлов.
Евгений Маврин Хөкүмәтнең халыкка ачыграк була баруын билгеләде. Журналистларны материалларны бирү формалары турында уйланырга чакырды, теге яки бу вакыйгага хәбәр­ченең шәхси мөнәсәбәтен бе­лергә, үз бәясен укырга телә­вен әйтте. Ил башка­ласыннан яисә башка илләрдән килүче кунаклар белән әңгәмәләр кору зарурлыгын ассызыклады.
Көннең икенче яртысында мат­бугат хезмәтләре һәм мәгъ­лүмат чаралары хезмәт­тәшлеге проблемаларына ба­гышланган өч “түгәрәк өстәл” үтте. “Алдың да таш­ладың: матбугат хезмәтләре һәм киң­күләм мәгълүмат чаралары ара­сындагы хезмәттәшлек инструменты буларак Пресс-релиз”, “Тәрҗемә итү авырлыклары: матбугат хез­мәтләреннән коммента­рийлар алу һәм аларны матбугатта файдалану”, “Матбугат чараларында мәгълүмати һәм коммерция материаллары арасындагы аермалар” дип аталган сөйләшүләрдә теләгән һәркем катнаша алды.