-15 °С
Болытлы
Гәзиткә язылуVKOKTikTokINSTAGRAM
Барлык яңалыклар
Төрлесеннән
18 февраль 2015, 22:33

Иске фатирдан – яңага!

Кайчан гына Иглин уртача зурлыктагы район үзәге иде. Бүген исә авыл киңәйгәннән-киңәя. Аның чикләре Уфага якынлашып килә. Мегаполиска якын урнашкан, табигать кочагына сыенып утырган Иглинда яшәргә теләүчеләр күп. Шуңа күрә кая карама яңа йортлар калкып чыга. Үзе бер бистәне хасыйл иткән күпкатлы йортлар да бик тиз үз хуҗаларын таба. Районда авария хәлендәге йортларда яшәүчеләрне яңа торакка күчерүгә зур игътибар бүленә. Бу хакта статистика мәгълүматлары да сөйли.

Былтыр Иглин авылының Ворошилов урамында – бишкатлы ике, Ленин урамында күпкатлы бер йорт файдалануга тапшырылган. Йортлар, хуҗаларына бәхет өләшүдән тыш, район үзәгенең “йөзек кашы”на әверелгән.
Мәгълүм булуынча, былтыр илдә торак-коммуналь хуҗалыкны реформалау кысасында күпкатлы йортларны капиталь ремонтлау башланды. Иглин районында да бу юнәлештә телгә алырдай күрсәткечләр бар. Әйтик, үткән елда Олы-Теләк, Кудеевка һәм Иглин авылларындагы күпкатлы йортларны капиталь төзекләндерүгә 3,9 миллион сумнан артык акча тотынылган. Шул ук вакытта, 2013-17 елларда халыкны авария хәлендәге торактан яңага күчерү программасы да нәтиҗәле гамәлгә ашырыла. Иглинда авария хәлендәге 25 йорттан – 250, Кудеевка авылында авария хәлендәге 8 йорттан 165 ке­ше яңага күчерелгән. Бу эш быел да дәвам итә. “Дуслык” бис­тәсендә 43 фатир үз хуҗасын табачак. Гомумән, 2017 елга ка­дәр районда бер меңнән артык кеше бөтен шартлары булган өр-яңа фатирларга күченәчәк.
Соңгы елларда торак мәсьәләсе бик күпләрнең баш бәласенә әверелде. Фатирны акча туплап сатып алу мөмкин түгел. Ипотекага һәркемнең кесәсе мөмкинлек бирми. Мондый хәл-шартларда Иглин районында торак төзелешенә җитди игътибар бү­ленү игътибарга лаек. Беренчедән, яңа йортлар район үзәгенең йөзен матурлап тора. Икенчедән, күбрәк төзелгәч, хаклар “тешләшми”. Авария хәлендәге йортларда яшәүчеләрнең миллион сумнар торган фатирларда өй туйлавы да урындагы җитәкчелекнең кайгыртучанлыгы турында сөйли.