-9 °С
Болытлы
Гәзиткә язылуVKOKTelegramЯRus
Барлык яңалыклар
Төрлесеннән
13 октябрь 2016, 02:00

“Хыялымдагы генерал башка төрле”

Яшь режиссер Редик Ганиев белән әңгәмә.Краснокама мәдәният бүлеге яшь белгеч — методист, “Замандаш” халык театры җитәкчесе Редик Ганиевтан бик уңды. Яшь, сәләтле егет һәрвакыт ижади эзләнүләрдә, аның проектлары мактауга лаек. Узган ел ул Краснокама районы юбилеена багышланган “Авылым сукмаклары” дип исемләнгән конкурс-фестиваль оештырды һәм бу проект районда зур популярлык яулады. Берничә ел рәттән режиссер тирән эчтәлекле әсәрләрне сәхнәләштерде. Редик катлаулы, фәлсәфи әсәрләр алырга курыкмый, аларны эшкәртеп, тамашачыга тәкъдим итә. Узган ел нәтиҗәләре буенча Редик Фирдәвис улы республикада үзешчән театр коллективлары җитәкчеләре арасында иң яхшысы булып танылды.

— Редик, эшегез тынгысыз, мәшә­катьле, бәйрәмнәр артыннан бәй­рәм­нәр, чара артыннан чара... Тормы­шыңны мәдәният белән бәйләгәнеңә үкенми­сеңме?

— Без бит тере кешеләр, безгә бар нәр­сә дә хас. Андый чаклар да булгалый. Әмма бу мәдәният өлкәсендә эшләгәнгә түгел, профессиональ сәнгать юлыннан китмәүгә үкенеч. Минемчә, әле дә соң түгел — барысы да алда. Ә инде район мәдәният бүлегендә эшләү — искиткеч зур тәҗрибә туплау, чыныгу алу ул.

— Районда чараларның күбесе синең сценарийлар буенча үтә. Сценарий төзегәндә, бәйрәм үткәргәндә синең өчен иң мөһиме нәрсә — аның эчтә­легеме, матур сүзләрме, кыскалыкмы, теманың ачылышымы?

— Сценарий төзегәндә, беренчедән, тамашачы нәрсә күрергә тели, шуны аңларга һәм мөмкин кадәр югары дәрәҗәдә бирергә тырышам. Икенчедән, коллектив­ларның мөмкинлеген игътибарга алам. Артык югары планка куеп, аны үти алмаска тиеш түгелбез. Шуңа күрә монда һәр детальне ачык күзалларга кирәк.

— Тормыш иптәшең ир-ат өчен хезмәт хакы аз дип битәрләмиме?

— Тормыш иптәшем мине аңламаса, акчаны капчык белән алып кайтсам да, җитмәс иде. Иҗат кешесен аңлый белгәне, әллә нинди таләпләр куймаганы өчен мин аңа рәхмәтле.

— Син үзеңне районның патриоты дип әйтә аласың­мы?

— Мин үземне Красно­каманың патриоты итеп хис итәм. Укыганда, бик кызыктыргыч тәкъдимнәр булып, башка төбәктә эшләргә, яшәргә мөм­кинлек туган иде. Әмма мин үземнең районда калырга булдым. Бу, әлбәттә, туган ягымны бик нык яратудан. Хәзер инде шулай уйлыйм: кайда гына хез­мәт итсәм дә, мин Краснокама улы булып калам. Кайда гына булсам да, туган районым­ның дәрәҗәсен төшерергә түгел, ә күтәрергә тиешмен!

— Тормыш юлыңны яңадан башлау мөмкинлеге булса, анда мәдә­нияткә урын калыр идеме?

— Әллә нәрсәләр, әллә нинди башка һөнәрләр турында уйлансам да, ярый әле тормышым мәдәният белән бәйле, дигән фикергә киләм, шуңа сөенәм. Бу, чыннан да, минем һөнәр. Ходай мине шулай ярат­кан, ниндидер бурычлар йөкләгән һәм мин шуны үтәргә, халыкка мәдәният аша нидер җиткерергә тиешмен.

— Ә менә илебезнең мәдәният минист­ры итеп куйсалар, бүгенге системада нәрсәне үзгәртер идең?

— Халыкта һәр солдат генерал булырга хыялланырга тиеш, дигән сүзләр бар. Әмма мин күбрәк иҗат кешесе, чиновник түгел. Минем хыялдагы генерал икенче... Ә сорауга А.П. Чехов сүзләре белән җавап бирәсе килә: “Дело надо делать, господа!”

— Редик, театрның киләчәге нинди, ничек уйлыйсың?

— Илнең, җәмгыятьнең киләчәге турында сәясәтчеләр, экспертлар анык кына җавап бирә алмаганда, театрның киләчәге турында сүз йөртү читен, әлбәттә. Әмма шуны төгәл беләм: театр — яшәеше­безнең көзгесе ул. Ничә гасырлар яшәгән театр арытаба да яшәр, дип өмет­ләнәм.
Читайте нас в