+24 °С
Болытлы
Гәзиткә язылуVKOKTelegram
Барлык яңалыклар
Төрлесеннән
1 ноябрь 2016, 02:00

“Lumen” – татар гимназиясендә!

Уфаның киң билгеле уку йортында “Lumen” рок-төркеме музыкантларының автограф-сессиясе узды.Уфаның ил күләмендә танылган рок-музыкантлар Юрий Шевчук һәм Земфира Рамазанованың кече Ватаны булуын һәркайсыбыз белә. Ә менә соңгы елларда Русиядә киң популярлык яулаган “Lumen” рок-төркеме музыкантларының да башкалабызда туып үсүен күпләр белмидер дә әле. Ул гына да түгел, төркемгә нигез салган Рөстәм Булатов (Тэм), Денис Шаханов (Дэн) һәм Игорь Мамаев (Гарик) 1997 елда Уфадагы 84нче татар гимназиясен тәмамлаганнар. Алар яңа гимназиянең беренче чыгарылыш укучылары була.

Октябрь ахырында Рөстәм Булатов һәм Игорь Мамаев, уку йортыбызга кунакка килеп, укучылар белән очрашу үткәрде. Әлеге чара 84нче татар гимназиясенең 25 еллык юбилеена багышланган иде. Очрашуны гимназия директоры Равил Идрисов ачты һәм мәктәпнең тарихы турында сөйләде, кунакларга истәлекле бүләкләр тапшырды.
Музыкантлар сорауларыбызга җавап бирде, төркемнең тарихы турында сөйләде. Баксаң, Денис белән Игорь рок-музыка белән мәктәп елларыннан ук шөгыльләнә башлаганнар икән. Алар аерылгысыз дуслар була, музыкаль төркем төзеп, иптәшләре алдында концертлар куя. Аннары вокаль осталыкларын камил­ләштерү максатында төркемгә сыйныфташлары Рөстәм Булатовны чакыралар. Алар сыйныфташларын талантлы шагыйрь һәм музыкант буларак белә. Тиздән Рөстәм Булатов төркемнең лидерына әверелә. Шул ук елда репетицияләр базасы булдырыла, төркемгә бас-гитарачы Евгений Огнев килә.

1999 елда коллектив илкүләм популярлык яулый башлый, 2002 елда исә аларның беренче аудиоальбомнары дөнья күрә. Бүген “Lumen” илдәге иң популяр рок-төркемнәр исем­л­егенә керә. Аның 15ләп аудиоальбомы дөнья күргән, гастрольләр графигы нык тыгыз. Ул Русия шәһәрләрен дә, чит илләрне дә үз эченә ала.

Яшь тамаша­чы­ларның сорауларына җавап биргәч, музыкантлар, төркемнең бергә төшкән фото­рәсемнәрен таратып, автограф-сессия үт­кәрде, “Голоса мира” дип аталган җырларына төше­релгән видеоклипларын күрсәттеләр, татар телендә язылган “Урманга” дип аталган җырларын уйнап ишеттер­деләр.

Укучылар тарафыннан әзерләнгән бай концерт программасын караганнан соң, кунаклар туган уку йортларында үзләрен бик җылы кабул итүгә шат булуларын әйтте, оештыручыларга рәхмәт белдерде. Без дә шундый данлыклы музыкантлар белем алган 84нче татар гимна­зиясенең укучылары булуыбызга чиксез горурлык хисләре кичердек. Әйткәндәй, төр­кемнең лидеры Рөстәм Була­товның улы Тимерлан да безнең белән бергә, гимна­зиянең VI “в” cыйныфында белем ала.

Ләйсән ФАЗЛЕТДИНОВА,
84нче татар гимназиясенең VI “а” cыйныфы укучысы.
Читайте нас: