Мандаринның чагу төслесен сайлагыз!

Мандаринда бик күп витаминнар, микро- һәм макроэлементлар, антиоксидантлар, шулай ук гөмбәләр үсешен киметүче матдәләр, артык холестеринны чыгаручы һәм эчәклеккә яхшы йогынты ясаучы азык җепселләре бар. Кышкы чорда, вируслы авырулар вакытында, мандарин аеруча файдалы.

Аның төсе чагурак  булган саен, составында бета-каротин күбрәк була. Ә бу —иммун системасы өчен беренче ярдәм. Ул йөрәк өчен дә файдалы, анда йөрәк мускулын ныгыта торган калий күп.

Бу җимешне ашказан авыруы, гастрит, югары ачылык булган кешеләргә бик сак кулланырга кирәк. Шуны истә тотыгыз: ач ашказанга мандарин ашарга ярамый. Кабыгын чәйгә салып эчәргә яратучылар чит илдән китерелгән мандариннарның сәламәтлеккә зыян китерүче төрле чаралар белән эшкәртелүен дә онытмаска тиеш. Тышы ялтырап торган җимешнең кабыгын кулланырга ярамый. Диетологлар сәламәтлеккә зыян китермичә көненә ничә мандарин ашарга мөмкин булуы турында киңәшләр бирә. Алар әйтүенчә, көненә 2-3 мандарин ашарга мөмкин. Әлбәттә, кемдер аны яртышар килограммда ашый ала, әмма бу кешенең көнгә күпме шикәр куллануына һәм аның сәламәтлегенә бәйле.

Фото: cdn-storage-media.tass.ru