Ана капиталыннан айлык түләү кемгә тиеш?

Өч яшькә кадәрге балалары булган гаиләләр ана капиталы акчаларыннан айлык түләү ала ала. Моның өчен гаиләнең җан башына уртача кереме төбәктәге ике яшәү минимумыннан артмаска тиеш.

Керемне исәпләгәндә гаиләнең 12 ай эчендәге барлык кереме – хезмәт хакы, пенсия, премия, стипендия, алимент, эшкуарлык кереме һәм кертемнәр буенча процентлар исәпкә алына. Гомум керем 12гә, аннары гаилә әгъзалары санына бүленә. Әгәр килеп чыккан сумма ике төбәк яшәү минимумыннан түбән булса, гаилә түләү алырга хокуклы.

Түләүне гаиләдәге теләсә кайсы балага өч яшь тулганчы рәсмиләштерергә мөмкин. Гаиләдә өч яшькә кадәрге берничә бала булса, һәр балага түләү алырга мөмкин.

Гариза бирү өчен гамәлдәге ана капиталы сертификаты кирәк. Аны «Дәүләт хезмәтләре» порталы аша, Социаль фондның клиентлар хезмәтендә яки МФЦда бирергә мөмкин. Бала туганнан соң алты ай эчендә мөрәҗәгать ителгән очракта, түләү ул туган айдан башлана. Соңрак бирелгән гаризалар буенча акча мөрәҗәгать иткән көннән түләнә.

Түләүне бер елдан соң озайту өчен яңадан гариза бирергә кирәк. Балага өч яшь тулгач яки ана капиталы акчалары тотылып беткәч, түләү автоматик рәвештә туктатыла.

Түләү күләме бала өчен төбәктә билгеләнгән яшәү минимумына тигез.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102