Бер мәйданда – йөзләрчә децибел!

Балтач районында җәй ахырында истә калырлык чара булды – “Сельский автозвук” автотавыш бәйгесе узды. Бер мәйданга Башкортстанның төрле район һәм шәһәрләреннән, шулай ук Пермь краеның Чернушка шәһәреннән автомобиль сөючеләр килде. Биредә машиналарның тавыш көче генә түгел, ә аларның техник мөмкинлекләре, акустик системаларның сыйфаты һәм хуҗаларының осталыгы да сыналды. Тамашачылар өчен исә бу көн көчле баслар, төрле автомобильләр һәм үзенчәлекле техник чишелешләр белән истә калды.

Бу көнне автомобиль гадәти транспорт чарасы булудан туктап, үзенә күрә бер музыкаль системага әверелде. Машинада урнаштырылган динамиклар саны, тавышның көче һәм чисталыгы, акустиканың көйләнеше – болар­ның барысы да нәтиҗәгә тәэсир итте. Үлчәүләр башлангач, мәй­данны көчле бас тавышлары биләп алды. Аны колак белән генә түгел, бөтен тән белән тоярга мөмкин иде.

Бәйгене Балтач районында илебезнең DL Audio компаниясе вәкиле Антон Тимофеев һәм Балтач районы хакимияте оештырды. Чараның генераль иганәчесе – “DL Audio” компаниясе, ә партнеры – “Universal Ufa” автотавыш һәм тюнинг студиясе. Урындагы эшкуарлар да әлеге чарага ярдәм күрсәтте. Алар арасында “Орион” сәүдә үзәге, “Дүрт почмак” кафе-пекарнясы һәм “Ямурза ихатасы” глэмпингы бар.

Бәйгенең “Сельский автозвук” дип аталуы да очраклы түгел. Автотавыш белән кызыксынуны гадәттә зур шәһәрләр, махсус күргәзмәләр һәм профессиональ студияләр белән бәйләргә күнек­кәнбез. Әмма бүген бу мавыгу авыл җирендә дә үсеш ала һәм үзенә төрле яшьтәге һәм төрле һөнәр ияләрен җыя. Балтачтагы чара шуның ачык дәлиле булды.
Катнашучылар берничә юнәлештә көч сынашты. Аларның бер өлешендә төп критерий автомо­биль­дәге динамиклар саны булса, икенчесендә урнаштырылган системаның бәясе исәпкә алынды. Мондый формат төрле мөмкин­лекләргә ия катнашучыларга үз осталыкларын күрсәтү һәм җиңү өчен көрәшү мөмкин­леге бирде.
“Фронт 2х” классында, ягъни ишеккә ике динамик урнаштырылган автомобильләр арасында, беренче урыннарны Айдар Сабиров һәм Илназ Хатыйпов яулады.
“Фронт 6х” классында пьедес­талның өч баскычын да Балтач районы вәкилләре алды. Беренче урынны – Идрис Дилмиев, икенчене – Артур Гыйзәтуллин, өченче урынны Самат Сәгыйтов яулады. “Фронт 12х” классында исә иң яхшы нәтиҗәне Илдар Кәримов күрсәтте.

Иң мавыктыргыч категория­ләр­нең берсе “Фронт анлим” булды. Биредә автомобильдәге динамиклар санына чикләү куелмаган, шуңа күрә катнашучылар үз системаларының мөмкин­лекләрен тулысынча күрсәтә алды. Бу класста беренче урынны Уфадан килгән Артем Хафизов алды. Икенче урын – Чернушкадан Даниил Галиевта, өченче урын аның якташы Сергей Найдановта.
Автотавышның ни өчен аның белән мавыгучылар өчен гади генә көчле музыкадан күпкә зуррак әһәмияткә ия булуы да шушы бәйгедә ачык күренде. Һәрбер автомобиль системасы артында исәп-хисап, җиһаз сайлау, көйләү һәм күп сәгатьлек хезмәт тора. Кайбер проектлар айлар дәва­мында гаражда яки махсус студиядә әзерләнә. Ә бәйге мәй­данында шул хезмәтнең нәтиҗәсе тамашачы хөкеменә тәкъдим ителә.

Тамашачылар өчен автомобиль системасының бәясенә карап көч сынашкан категорияләр дә кызыклы булды. Биредә төрле финанс мөмкинлекләренең анык техник чишелешләргә ничек әвере­лүен күрергә мөмкин иде.
“30000 сумга кадәрге система” классында җиңүчеләр – Илназ Хатыйпов һәм Дүртөйле районыннан килгән Айнур Шакиров.
“35000-40000 сумлык система” категориясендә беренче урынны Самат Сәгыйтов яулады. Икенче урында – Идрис Дилмиев, өченче урында – Артем Хафизов.
“40000-60000 сумлык система” классында Артур Гыйзәтул­лин һәм Илдар Кәримов аерылып торды.
Ә иң кыйммәтле категориядә – “100000 сумнан югары система” классында – беренче урынга Сергей Найданов чыкты. Икенче урынны Даниил Галиев, өченче урынны Дүртөйледән килгән Данис Дәү­ләтов яулады.

Шул ук вакытта бәйге бары тик протоколдагы саннар өчен көрәштән гыйбарәт булмады. Кемдер автомобильдән мөмкин кадәр көчле тавыш чыгарырга омтылды, икенчеләр өчен тавышның сыйфаты һәм чисталыгы мөһим булды. Өченчеләр исә билгеле бер бюджет кысаларында мөмкин кадәр уйланылган система төзүне максат итеп куйды. Шушы төр­лелек чараны автотавыш белән профессиональ дәрәҗәдә кызыксынучылар өчен дә, гади тамашачы өчен дә кызыклы итте.
“Сельский автозвук” бәйгесе автомобильләр белән мавыгуның зур район чарасына нигез була алуын күрсәтте. Бер мәйданда Балтач районы халкы, респуб­ликаның башка районнарыннан килгән кунаклар һәм күрше төбәктән катнашучылар очрашты. Аларның барысын да уртак кызыксыну – үз автомобильләрен күрсәтү, башкаларның системаларын бәяләү һәм фикердәшләр белән аралашу теләге берләш­терде.

Тамашачылар өчен бу чара автомобиль хуҗаларының гадәт­тә чит күзләрдән яшерелгән хезмәт нәтиҗәләрен күрү мөмкин­леге дә булды. Гаражларда алар айлар дәвамында җиһаз алыштыра, сис­темаларны көйли, акустика белән тәҗрибәләр үткәрә. Бәйге вакытында исә шул хезмәт­нең нәти­җәсе киң җәмәгатьчелек алдына чыкты.

Шуңа күрә “Сельский автозвук”ны иң көчле автомобильне ачыклау бәйгесе дип кенә бәяләү дөрес булмас. Бу техник иҗат, үз эшеңә бирелгәнлек һәм сәламәт көндәшлек бәйрәме. Биредә децибеллар гына түгел, һәр ав­томобильнең хуҗасы, аның тәҗ­рибәсе, характеры һәм үз машинасын камилләштерүгә омтылышы да бәяләнде.

Балтач районында җәй ахыры чын мәгънәсендә көчле тавыш белән тәмамланды. Катнашучылар һәм тамашачылар­ның кызыксынуы “Сельский автозвук”­ның киләчәктә дә районда үз урынын табачагына өмет бирә. Ә көчле һәм сыйфатлы тавышны яратучылар өчен Балтач районының яңа очрашулар мәйданына әверелү мөмкинлеге бар.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102

Фиргать НӘБИУЛЛИН.
Балтач районы.