Уфада самолет басып алынганга 40 ел: яшерен материаллар халыкка күрсәтелде

2026 елның сентябрендә Уфада 1986 елда булган самолет басып алу вакыйгасына 40 ел тулды. 20 сентябрьдә аэропортта Ту-134А самолетын хәрби частьтән качкан кораллы дезертирлар басып алган. Алар экипаждан самолетны Пакистанга очыруны таләп иткән.

Вакыйгадан соң КГБ БАССР тикшерүчеләре һәм махсус бүлек хезмәткәрләре алып барган эш озак вакыт яшерен сакланган. 2023 елда Русия ФСБның Башкортстан буенча идарәсе җинаять эшенең 22 томын сердән чыгарды.

Ачыкланган материаллар арасында басып алынган самолетның пуля эзләре төшкән фотолары, трассологик экспертиза нәтиҗәләре, җинаятьтә гаепләнүчеләрнең сорау алу беркетмәләре, характеристикалары һәм суд-психиатрия экспертизасы актлары, шулай ук шаһитларның күрсәтмәләре бар.

ФСБ мәгълүматлары буенча, 1986 елның 20 сентябрендә төнге сәгать 2:40та экипаж диспетчерларга самолетка ике кораллы кешенең бәреп керүен хәбәр итә. Алар пулемёт һәм автомат белән коралланган була.

Тиз арада Уфага «А» төркеме хезмәткәрләре җибәрелә. Операцияне урында КГБ БАССР рәисе, генерал-майор Владимир Мищенко җитәкли. Самолетны азат итү операциясе 8 секунд дәвам итә. Бер басып алучы үтерелә, икенчесе аякка яралана. Соңрак ул дәвалана һәм суд карары белән атып үтерелә. Җинаять төркеменең башка әгъзалары кулга алынып, төрле срокларга ирегеннән мәхрүм ителә.

Операциядә катнашкан генерал-майор Геннадий Зайцев сүзләренчә, КГБ хезмәткәре Анатолий Коцага техник булып самолетка кереп, басып алучылар белән сөйләшүләр алып бара. Ул самолет атыш вакытында зыян күргән һәм ремонт таләп итә дип ышандыра. Шулай итеп, җинаятьчеләрнең саны һәм кораллары турында мөһим мәгълүмат алына.

Операциядә катнашкан хезмәткәрләрнең бер өлеше дәүләт бүләкләренә лаек була. Геннадий Зайцевка Советлар Союзы Герое исеме бирелә. Анатолий Коцага Кызыл Йолдыз ордены белән бүләкләнә. Шулай ук тикшерү хезмәткәрләре һәм самолет экипажы әгъзалары да төрле бүләкләргә ия була.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102