+21 °С
Болытлы
Республика
29 Май 2021, 00:45
Туймазы яңа икътисади мөмкинлекләрне барлый
Республика Башлыгы Радий Хәбиров бүген Туймазы районында булды.
Республика Башлыгы Радий Хәбиров бүген Туймазы районында булды.
Ул Туймазы шәһәрендәге Ленин проспектында «Башкортстан ихаталары» программасы буенча гамәлгә ашырылучы төзекләндерү белән танышты.
Шәһәр мэры Эдуард Рәхмәтуллин аңлатканча, беренче этапта тротуарларда, мәйданчыкларда һәм кварталара юлларда асфальт-бетон катламын яңарту буенча эшләр башкарырга планлаштыралар. Аннан соң биредә уен һәм спорт мәйданчыклары урнаштырылачак, ишегалларын яшелләндерәчәкләр, аларда яңа яктырткычлар һәм видеокүзәтү системасы барлыкка киләчәк.
Башкортстан Башлыгы урындагы халык белән аралашканда быел барлык эшләрне төгәлләү өчен территорияне төзекләндерүгә өстәмә акча бүлеп бирергә кушты.
– Узган елда Туймазыга ихаталарны төзекләндерүгә 57 миллион сум бүлеп бирдек, ә быел коронавирус аркасында бу ярдәм 11 миллион сумга кадәр кимеде. Аерма зур. Шуңа күрә без шәһәргә тагын 15 миллион сум өстәячәкбез, - диде Радий Хәбиров. – Ә киләсе елда «Башкортстан ихаталары» программасы буенча республика бюджетыннан 40-50 миллион сум бүлеп бирергә тырышырбыз. Безнең бурыч - 2024 елга ихаталарның 80 процентын төзекләндерү.
Радий Хәбиров Туймазы районына эш сәфәре кысаларында «САВА» ит комбинатында булды һәм аның җитәкчелеге белән җитештерүне үстерү перспективалары турында фикер алышты.
Предприятиене гамәлгә куючы Азат Каһиров хәбәр иткәнчә, коллектив инде 20 елдан артык колбасалар һәм ит деликатеслары җитештерә. Биредә Русия төбәкләрендә һәм БДБ илләрендә сатыла торган 200дән артык төр продукция җитештерелә.
2021 елның дүрт аенда казылык әйберләре җитештерү күләме 2 мең тоннадан артык тәшкил итте. Шул ук вакытта, продукциягә ихтыяҗ кимү сәбәпле, предприятие тулы булмаган эш режимында эшли.
Башкортстан Башлыгы ит комбинаты җитәкчелеген җитештерүне үстерү перспективалары һәм аңа дәүләт ярдәме чаралары турында фикер алышу өчен «Инвестчас» ка чакырды.
Радий Хәбиров Туймазы районына эш сәфәре кысаларында «Экология Т» җәмгыяте Төбәк операторының чүп-чарны сортларга аеру комплексында булды.
– Без планлы рәвештә чүп-чар реформасын уздырабыз, - дип ассызыклады Радий Хәбиров. - Әле ике ел элек кенә төбәктә нормаль контейнерлар һәм чүп мәйданчыклары юк иде. Һәм карагыз әле, алар хәзер безнең шәһәр һәм бистәләрдә никадәр күп. Каты коммуналь калдыклар полигоннарына чүп чыгаруны фото- һәм видеотеркәү алып барыла. Бу - чын революцион алга китеш. Әмма, әлбәттә, бу юнәлештә безгә башкарасы эшләребез бар әле.
Республика Башлыгының Туймазы районына эш сәфәре биредәге төзекләндерелүче "Спартак" стадионында Башкортстан Хөкүмәте һәм район хакимияте вәкилләре арасында футбол ярышы белән тәмамланды.
Фото: "Глава РБ"
