Башкортстан белән Удмуртия арасында чик кайдан үтә?

Башкортстан Республикасы белән Удмуртия Республикасы арасындагы административ чик өлешләрен билгеләү буенча җир-төзекләндерү документлары Росреестрда уңышлы экспертиза узды.

- Чикләрне билгеләү буенча барлык бәхәсле моментлар диярлек документларны хокукый анализлау нигезендә ике төбәкнең уртак эше барышында хәл ителде. Субъектлар башлыклары чикне тасвирлау турында килешүне имзаладылар. Төбәкләр арасындагы чикләрнең төгәл урнашу урыны турындагы мәгълүматлар күчемсез милекнең Бердәм дәүләт реестрына кертеләчәк һәм ачык кадастр картасында чагылдырылачак ", - дип билгеләде Башкортстан буенча Росреестр идарәсе җитәкчесе Петр Клец.

Ул чикләрнең төгәл координатларын билгеләү төбәкләргә территориаль һәм җир бәхәсләренең санын киметергә мөмкинлек бирәчәк һәм җир ресурслары белән нәтиҗәлерәк идарә итүгә ярдәм итәчәк, дип ассызыклады.

Удмурт Республикасы белән Нефтекама шәһәр округы, Краснокама районының Мүзәк, Николо-Березовка, Саузбаш авыллары чиктәш. Төбәкләр уртак чикләрне 2018 елда ук килештерә башлаган.

Башкортстан чикләренең гомум озынлыгы 3800 километрдан артык. Республика 6 субъект белән чиктәш: Пермь крае, Свердловск, Чиләбе, Ырынбур өлкәләре, Татарстан һәм Удмуртия республикалары.

Бүгенге көндә Башкортстанның Пермь крае (2018 елда) һәм Свердловск өлкәсе (2021 елда) белән чикләре тулысынча расланган һәм Бердәм дәүләт реестрына кертелгән.

Шулай ук Чиләбе өлкәсе белән чикләр буенча килешү субъектлар башлыклары тарафыннан имзаланды, хәзерге вакытта җир төзекләндерү экспертизасы уза.